Франсиядаги заргарлик заводидан 50 килогача олтин ўғирланди
Ўғрилар заводдан қочиш вақтида йўлга михлар сочиб кетган. Воқеа жойига келган полиция автомобилларининг шиналари тешилган.
Франсиядаги заргарлик заводидан 50 килогача олтин олиб кетилди
Франсияда номаълум шахслар заргарлик заводидан 50 килограммгача олтин ва бошқа қимматбаҳо буюмларни ўғирлаб кетди.
Маълумотларга кўра, ўғрилик 3-ноябр куни Безансон шаҳридаги заргарлик заводида юз берган. Эрталаб соат 7:00 лар атрофида ниқоб ва бронжилет кийган беш нафар шахс завод ҳудудига бостириб кирган. Улар узун стволли қуроллардан бир неча бор ўқ узиб, ходимларни қўрқитган.
Қочиш чоғида ўғрилар йўлга атайлаб михлар сочиб кетган. Натижада полиция автомобили ва мотосиклининг шиналари тешилган. Жиноятчилар қочишда фойдаланган автомобил кейинчалик ёқиб юборилган ҳолатда топилган.
Ҳужум оқибатида заводнинг бир ходими жароҳат олган. Прокуратура тергов бошлаб, ишни уюшган жиноятчиликка қарши кураш бўлимига топширган. Безансон шаҳрида қимматбаҳо металларга ишлов берувчи бир нечта корхона фаолият юритади. Шу боис заргарлик ва қимматбаҳо металл буюмлари ишлаб чиқариш соҳаси жиноятчилар ҳужумига мунтазам дуч келади.
Франсияда июл ойида ниқобли шахслар Элзасдаги Лалиқуе музейига бостириб кириб, атиги 11 дақиқада 4,5 миллион еврога баҳоланган заргарлик буюмларини ўғирлаб кетган эди.
Сентябр ойида эса икки ниқобли шахс Канй-сур-Мер шаҳридаги Ренуар музейига бостириб кириб, уч дақиқадан камроқ вақт ичида Ренуарнинг тўртта асарини ўғирлаб кетган. Полиция етиб келганида, улар асарларнинг иккитасини музей боғида ташлаб кетган эди.