ФИФА аргентиналик футболчиларга берилган жазоларни енгиллаштирди

ФИФА аргентиналик футболчиларга нисбатан қўлланилган жазоларни юмшатди.

Аргентина футбол ассоциацияси (АФА) 2026-йилги Жаҳон чемпионати финалидан кейин юзага келган жанжалда иштирок этган жамоа аъзоларига берилган жазолар юзасидан ФИФАга шикоят билан мурожаат қилган эди. Унда дисквалификация қилинган футболчиларга жазони фақат расмий турнирларда эмас, балки яқинлашиб келаётган "А" тоифасидаги ўртоқлик учрашувларида ҳам ўташга рухсат бериш сўралган.

ФИФА Тартиб-интизом қўмитаси ушбу мурожаатни кўриб чиқиб, АФАнинг сўровини маъқуллади. Бу шуни англатадики, дисквалификация қилинган футболчилар ўз жазоларини тезроқ ўтаб, терма жамоа сафига қайтишлари мумкин бўлади.

Шу билан бирга, Аргентина футбол ассоциацияси ФИФАдан жазолар бўйича тўлиқ асослантирилган ҳужжатларни кутмоқда. Шундан сўнг улар ташкилотнинг Апелляция қўмитасида эътироз билдиришни режалаштирмоқда. Агар бу ҳам ёрдам бермаса, ассоциация юристлари Лозаннадаги Спорт арбитраж судига (САС) мурожаат қилишга тайёр.

Маълумот учун, ЖЧ-2026 финали якунланганидан сўнг Аргентина терма жамоаси яримҳимоячиси Паредес Испания футболчилари билан тортишиб қолган эди. ФИФА қўмитаси аргентиналик футболчини учта қоидабузарликда айбдор деб топиб, унга 10 та ўйинга дисквалификация ва 90 минг доллар жарима белгилаган эди.

Аргентина терма жамоасининг яна икки футболчиси ҳам жазога тортилган. Ноел Молинага 7 та ўйинлик четлатиш ва 90 минг доллар жарима, Тиаго Алмадага эса бир учрашувлик дисквалификация ҳамда 30 минг доллар миқдорида жарима белгиланган эди.

Мазкур можаро 19-июл куни АҚШнинг Ню-Жерси штатидаги "Метлайф" стадионида бўлиб ўтган ЖЧ-2026 финалидан сўнг юз берган. Унда Испания қўшимча вақтда Ферран Торреснинг голи эвазига Аргентина устидан 1:0 ҳисобида ғалаба қозониб, Жаҳон чемпиони бўлган эди.