Фернандеш мағлубиятдан кейин бош мураббийга қарши чиқди
«МУ» сардори Керрикнинг «Комо»га қарши қўллаган тактикасини танқид қилди, мураббий эса футболчиларнинг ўзини айблади.
Фернандеш мағлубиятдан сўнг бош мураббийга қарши чиқди
«Манчестер Юнайтед» ЕЧЛ гуруҳ босқичининг 3-турида «Комо» майдонида йирик ҳисобда мағлуб бўлди — 1:4. Учрашувдан кейин эса клуб ичида можаро юзага келди: жамоа сардори Бруну Фернандеш бош мураббий Майкл Керрикнинг тактик режасини очиқ танқид қилиб, тўпсиз ўйнашда бошқача ёндашувни таклиф қилди.
«Юнайтед» сафардаги баҳсда илк дақиқаларданоқ қийинчиликка дуч келди: «Комо» яримҳимоячиси Нико Пас иккинчи дақиқадаёқ ҳисобни очди. Танаффусдан кейин италияликлар устунликни янада оширишди — Анастасиос Дувикас, Пас ва Хакобо Рамон навбати билан гол уришди. Меҳмонлар эса 91-дақиқада Жошуа Зиркзенинг ягона голи билан жавоб қайтаришди.
Ўйин тугагач, инглизлар жамоаси лагерида вазият кескинлашди. «МУ» сардори бош мураббий танлаган тактика ушбу учрашув учун тўғри бўлганига очиқчасига шубҳа билдирди. 67-дақиқада захирага олинган португалиялик яримҳимоячи персонал прессингдан воз кечилиб, рақибга тўп билан эркин ҳаракат қилиш имконияти берилганидан норози бўлган.
«Бу биз ўйинни ёмон бошлаб, тезкор гол ўтказиб юборган илк учрашувимиз эмас. Рақиб тўпга эгалик қилаётганида деярли босим ўтказмаяпмиз, тўп бизда бўлганда ҳам сифатли ўйнамаяпмиз, деярли ҳеч нарса ишламаяпти. Тезкор гол ўтказиб юборсанг, гўё аллақачон ютқазиб қўйгандек бўласан. Бундай ҳолатдан чиқиб кетиш қийин, дадил ҳаракат қилиш, тўпни назорат қилиш ва вазиятлар яратиш ҳам мураккаблашади. Агар биз буни уддалай олмасак, вазиятни ўзгартириш жуда қийин бўлади», – деди Бруну.
Шундан сўнг у мураббийлар штаби қарорлари ҳақида ҳам фикр билдирди.
«Персонал прессинг қилмаслик, рақибга бўшлиқ қолдириш ва тўпни олиб қўйиш учун имкон кутиш — бу мураббийларнинг қарори эди. Аммо бундай жамоаларга ҳаддан ташқари эркинлик берилса, улар ўзига катта ишонч ҳосил қила бошлайди. Бунга мен эмас, бош мураббий ва унинг штаби баҳо бериши керак. Баъзида дадилроқ ҳаракат қилиш, таваккал қилиш, олдинроқда босим ўтказиш ва рақибга ноқулайлик туғдириш керак. Уларнинг марказий ҳимоячиси мени майдоннинг иккинчи ярмидаёқ қарши олди. Биз ҳам шундай қилишимиз керак эди, лекин уддалай олмадик», – дея унинг сўзларини ТНТ Спорц келтиради.
Журналист Керрик танлаган тактика тўғридан тўғри хато бўлганми, деб сўраганида футболчи жавобдан қочди, бироқ танқидини давом эттирди: «Бу савол менга эмас, мураббий ва унинг штабига. Баъзида дадилроқ бўлиш керак, сизни прессинг қилишганида таваккал қилиш ва босим ўтказиб, уларни ўзини ноқулай ҳис қилишга мажбурлаш керак».