Дербида ҳакамлик можароси, «Барса» 4 та гол билан чекланди
Про Реф Ҳоланднинг голи ҳисобга олиниши ВАР хатоси сабаб бўлганини тан олди ва «Манчестер Юнайтед»дан узр сўради.
Дербидаги ҳакамлик можароси, «Барса» 4 та гол билан чекланди
«Манчестер Юнайтед» – «Манчестер Сити» 0:1
Гол:
Ҳоланд, 60 (0:1)
«Манчестер Юнайтед»: Ламменс, Магуайр, Мартинес, Доргу, Далот, Тилеманс (Шешко, 67), Майну, Бруну Фернандеш, Решфорд (Зиркзе, 83), Мбемо, Куня
«Манчестер Сити»: Доннарумма, Рубен Диаш, Гейи, Гвардиол, Матеуш Нунеш, Андерсон, Фернандес (ЎРайли, 82), Шерки (Ндиай, 46), Семенё, Фоден, Ҳоланд
Огоҳлантиришлар: Магуайр, 81 – Гвардиол, 79. Фернандес, 80
Четлатиш: Фоден, 23
Ҳусанов кетма-кет иккинчи учрашувда ҳам захирада қолди – Мареска ўнг қанот ҳимоясида Матеуш Нунешга ишонишда давом этмоқда. Керрик эса чап қанотда жароҳат олган Шоу ўрнига Доргуни майдонга туширди.
Манчестер дербисининг биринчи бўлими хавфли вазиятларга бой бўлмади – энг эсда қоларли ҳолат дарвозага уюштирилган ҳужум билан эмас, рақибларнинг бир-бирига ташланиши билан боғлиқ эди. Биринчи бўлим ўрталарида ўйиндаги сокинликни Бруно Фернандеш ва Фоден иштирокидаги тўқнашув бузди.
23-дақиқада Бруно ён чизиқ ёнида тўпни Фодендан олиб қўйишга уриниб, уни тепиб йиқитди. У ерда ётган рақибининг бел қисмига ҳам оёғи билан зарба берди.
Фоден бунга чидай олмай, ётган ҳолатда Брунонинг қорнига тепди, бироқ бош ҳакам Майкл Оливер португалиялик яримҳимоячининг ҳаракатини эътиборсиз қолдириб, фақат англиялик футболчини жазолади — тўғридан тўғри қизил.
Сон жиҳатдан устун бўлиб қолганидан кейин ҳам «МУ» кўп вазият ярата олмади, биринчи бўлимда дарвоза томон йўлланган ягона аниқ зарба 7-дақиқада Лисандро Мартинеснинг Доннарумманинг қўлига бориб тушган зарбаси бўлди. Шунингдек, бўлим охирида Решфорднинг, иккинчи бўлим бошида эса Майнунинг зарбаларидан кейин тўп устунга тегди. Шу вазиятлардан сўнг «МУ» сон устунлигидан фойдаланиб, рақибни босиб ташлаши кутилганди, аммо бундай бўлмади.
60-дақиқада яна бир баҳсли эпизод юз берди. Гвардиол қанотдан узатма берди, узоқ устун ёнида турган Ҳоланд тўпни бир тегинишда дарвоза тўрига жойлади. Аввалига майдондаги ҳакамлар норвегиялик ҳужумчини офсайдда деб топиб, голни бекор қилишди. Аммо вазиятга ВАР аралашиб, Ҳоланд тўғри ҳолатда бўлганини билдирди ва гол ҳисобга олинди.