Фақат мен борман…
Қирғизистонда охирги беш йилда расман қайд этилган никоҳлар сони сезиларли даражада камайди, ажрашишлар сони эса, аксинча, ортди.
2021 йилда мамлакатда 50,7 мингта никоҳ қайд этилган бўлса, 2025 йилга келиб уларнинг сони 43,3 минггача камайди. Шу тариқа, кўрсаткич тахминан 14,6% га қисқарди. Вa бир вақтнинг ўзида ажрашишлар сони 12 мингтадан 14,2 мингтагача ёки тахминан 18,3% га кўпайди.
Никоҳланишнинг узоқ муддатли пасайиш тенденцияси 2021 йилги кескин ўсишдан кейинроқ юзага келди. Ўшанда Қирғизистонда 50 747 та никоҳ қайд этилган эди. 2022 йилда уларнинг сони 48 232 тагача, 2023 йилда — 45 495 тагача, 2024 йилда эса — 45 033 тагача камайди.
Ажрашишлар бўйича эса тескари динамика кузатилди. 2021 йилда уларнинг сони 12 037 та, 2022 йилда — 12 187 та, 2023 йилда — 12 552 та, 2024 йилда эса аллақачон 13 042 тани ташкил этди.
Агар 2021 йилда битта ажрашишга тахминан 4,2 та қайд этилган никоҳ тўғри келган бўлса, 2025 йилда бу кўрсаткич тахминан учтани ташкил этди.
Янги маълумотлар Миллий статистика қўмитаси томонидан тайёрланган «Қирғизистон Республикасининг 2021–2025 йиллар учун демографик йилномаси»га киритилди. Тўпламда шунингдек туғилиш, ўлим, миграция ва аҳоли таркибининг ўзгариши кўрсаткичлари келтирилган.
Шу билан бирга, статистиканинг ўзи оилавий хулқ-атвордаги ўзгаришлар сабабларини тушунтирмайди. Динамикага никоҳ ёши, миграция, иқтисодий вазият, муносабатларни расмий қайд этишга бўлган муносабатнинг ўзгариши ва бошқа ижтимоий омиллар таъсир кўрсатиши мумкин.
Шунга ўхшаш ҳолат Ўзбекистонда ҳам кузатилмоқда. ЎзР Миллий статистика қўмитаси маълумотларига кўра, 2026 йилнинг январидан июнигача мамлакатда 92,3 мингта никоҳ қайд этилган — бу 2025 йилнинг шу даврига нисбатан 3 мингтага кам. Шу билан бирга, ажрашишлар сони ортишда давом этмоқда. Олти ой давомида 24,8 мингта никоҳни бекор қилиш ҳолати қайд этилди, бу бир йил олдингига қараганда деярли 1,5 мингтага кўпдир. Ажрашишларнинг катта қисми аввалгидек шаҳарлар ҳиссасига тўғри келмоқда: 14,9 мингта ҳолат ёки умумий соннинг 60,1% и. Никоҳни бекор қилишнинг энг кўп қисми Тошкент шаҳрига тўғри келди. Қишлоқ жойларда 9,9 мингта ажрашиш қайд этилди.