Эстония Россия билан чегарага элита қўшинларини тўпламоқда - ФТ
Эстония Россия билан эҳтимолий тўқнашувга тайёргарлик доирасида ҳарбий стратегиясини ўзгартирмоқда: элита қисмлари Россия чегарасига яқинлаштирилиб, 300 километргача масофага зарба бера оладиган қуроллар харид қилинмоқда.
Эстония Россия билан чегарага элита қўшинларини жамламоқда — ФТ
Эстония Россиянинг эҳтимолий босқинига тайёргарлик кўрар экан, элита бўлинмаларини Россия чегарасига яқинроқ жойларга кўчирмоқда ва узоқ масофага зарба бера оладиган қуролларни харид қилмоқда.
Эстония қуролли кучлари ва разведкаси раҳбарияти Москва НАТО билан, ҳеч бўлмаганда яқин икки йил ичида, кенг кўламли уруш бошлаш ниятида эмас, деган фикрда эмас, бироқ Россия келажакдаги эҳтимолий тўқнашувга ҳозирлик кўраётганини тахмин қилмоқда.
«Тийиб туриш механизми иш бермаяпти. Ушбу муаммони ҳал қилиш учун ўта муҳим паллага келяпмиз - бу ҳам биз учун, ҳам барча Болтиқбўйи мамлакатлари учун яқин бир-тўрт йил ичида бошланади», - деди Эстония ҳарбий разведкасининг юқори мартабали вакили.
Эстониянинг асосий ҳарбий базаси бўлган Тападан танлаб олинган қисмлар ҳозир мунтазам равишда шарқроқда, Россия чегарасига яқинроқ жойлашган позицияларга кўчирилмоқда.
Йихвидаги янги базадан ташқари, Нарвада ҳам 1000 нафаргача ҳарбий хизматчини жойлаштиришга мўлжалланган база қурилмоқда: у 200 аскарнинг доимий яшаши учун мўлжалланган, бироқ инқирозли вазият юз берса, яна 800 кишини ҳам сиғдира олади.
Шунингдек, сўнгги бир йил ичида Эстония Американинг 300 км масофага учадиган М57 баллистик ракеталарини ўз ичига олган тўққизта ҲИМАРС ёппасига ўт очиш реактив тизими ҳамда худди шундай масофага уча оладиган Жанубий Кореянинг тўққизта Чунмоо тизимини харид қилиш бўйича шартнома имзолади. Тападан Санкт-Петербурггача бўлган масофа 260 км ни ташкил этади.
Ушбу стратегияга кўра, Россия бостириб кирса, чақирув асосида тўпланган қўшинлар тезкор сафарбарлик қилиб, НАТО қўшимча кучлари етиб келгунига қадар партизанлик урушини олиб бориши ва душман кучларини ҳолдан тойдириши керак.
Бироқ Россиянинг Украинадаги ҳаракатларини таҳлил қилган Эстония ҳарбий раҳбарияти бундай режа самара бермайди деган хулосага келган. Энди улар Кремл йўқотишлар билан ҳисоблашмайди, деган фикрда. Эстонияда, шунингдек, россиялик ҳарбийлар эгалланган марраларни қайтариб бермасдан, ҳатто ҳудуддаги ҳамма нарса ер билан яксон қилинган бўлса ҳам, уни ўз назоратида ушлаб туришда давом этаётганига эътибор қаратилди.