Эрон урушни тугатиш бўйича АҚШга ўз таклифини юборди

**Эрон урушни якунлаш бўйича АҚШга таклиф юборди**

Эрон Қатар орқали АҚШга тинчлик таклифини етказди. Бу ҳақда Эрон Олий миллий хавфсизлик кенгаши котиби Муҳсин Ризоий Ал Жазеера телеканалига маълум қилди.

“Биз қатарлик воситачи билан алоқада бўлиб турибмиз. У Вашингтонга урушни тугатиш бўйича шартларимизни етказди. Ҳозир бу масала бўйича президент Трампнинг жавобини кутяпмиз”, деди у.

Эрон расмийсининг қўшимча қилишича, шартлар қуйидагиларни ўз ичига олади:

- барча фронтларда ҳарбий ҳаракатларни тўхтатиш;

- музлатилган маблағларни ечиш;

- денгиз блокадасини бекор қилиш.

Шунингдек, Ризоий АҚШ ва Исроилнинг ҳаракатлари Теҳронга Ядро қуролини тарқатмаслик тўғрисидаги шартномадан чиқиш учун асос беришини таъкидлади. Шунга қарамай, Эрон марҳум олий раҳнамонинг фатвосига содиқ қолмоқда ва ўз ядро доктринасини ўзгартирмаган.

Июн ойи ортида АҚШ ва Эрон тинчлик жараёнини бошлашга қаратилган меморандумни имзолаган эди. Бироқ уч ҳафта ўтгач, вазият яна кескинлашди. Вашингтон Теҳронни Ҳормуз бўғозидаги савдо кемаларини ўққа тутишда айблади. Шундан сўнг икки томон яна бир-бирига қарата ўт очишни бошлади.

20-август куни Доналд Трамп Эронга қарши иқтисодий ҳужум бошланганини эълон қилди. Унинг таъкидлашича, бу Эроннинг мисли кўрилмаган даражада яккаланиб қолишини англатади. Эрон ташқи ишлар вазири Аббос Ароқчи эса бу баёнотни АҚШнинг урушдаги мағлубиятини тан олиши деб баҳолади.

Аввалроқ Трамп Эрон нефтини ўзлаштириш билан таҳдид қилганди. У буни АҚШнинг Венесуеладаги улкан нефт захираларининг бешдан бир қисмини назоратга олишга қаратилган ҳаракатлари билан таққослаган.

“Охир-оқибат Эрондан чиқиб кетамиз, агар Венесуелада бўлгани каби қолиб, нефтни ўзимизда олиб қолишга қарор қилмасак”, деган Трамп журналистларга.