Энг кўп ёмғир ёғадиган мамлакатлар аниқланди
Колумбия дунёда ўртача йиллик ёғингарчилик миқдори энг юқори бўлган мамлакат деб топилди. Бу ерда бир йилда ўртача 3240 миллиметр ёғин тушади. Рейтингда мамлакатнинг энг серёғин нуқтаси эмас, балки бутун ҳудуди бўйича ўртача кўрсаткич ҳисобга олинган.
Энг кўп ёғингарчилик кузатиладиган давлатлар рўйхати эълон қилинди.
Ушбу рейтингга кўра, Колумбия йилига ўртача 3240 миллиметр ёғингарчилик билан биринчи ўринни эгаллади. Шуни таъкидлаш жоизки, Колумбия иқлими турли-туман бўлиб, баъзи ҳудудларида қуруқ саванналар, бошқаларида эса нам тропик ўрмонлар мавжуд.
Иккинчи ўринни Африка қитъасидаги орол давлат Сан-Томе ва Принсипи банд этди. Бу мамлакатда йилига ўртача 3200 миллиметр ёғин тушади ва ёмғирли мавсум тахминан тўққиз ой давом этади. Сан-Томе ва Принсипи энг серёғин ўнта мамлакат ичига кирган ягона Африка давлатидир.
Учинчи ўринда Папуа – Янги Гвинея жойлашган бўлиб, у ерда йиллик ўртача ёғингарчилик миқдори 3142 миллиметрни ташкил этади.
Энг серёғин мамлакатларнинг аксарияти бир нечта географик минтақаларда жойлашган. Масалан, Индонезия, Бруней ва Малайзия Жануби-Шарқий Осиёнинг денгиз ҳудудларида жойлашган. Жанубий Тинч океани минтақасидан Самоа, Соломон ороллари ва Папуа – Янги Гвинея рейтингга киритилган. Марказий Америкадан эса Коста-Рика ва Панама энг серёғин мамлакатлар қаторидан жой олган.
Қайд этиш жоизки, Ҳиндистондаги Маусинрам Ер юзидаги энг серёғин жойлардан бири бўлишига қарамай, Ҳиндистон ушбу рейтингнинг юқори поғоналаридан жой олмаган. Бунинг сабаби шундаки, рейтинг алоҳида шаҳар ёки ҳудуддаги эмас, балки бутун мамлакат бўйича ўртача ёғингарчилик миқдорига асосланган.