Инфографика: 2026-йилда энг кўп ҳудуди ёнган давлатлар
2026-йил 1-август ҳолатига кўра, дунё бўйлаб ўрмон ва ландшафт ёнғинлари қамраб олган майдон 112,3 миллион гектарга етди. Энг катта кўрсаткич Конго Демократик Республикасида қайд этилган - бу ерда 13,6 миллион гектар майдон ёнган.
Инфографика: 2026-йилда энг кўп ҳудуди ёнган давлатлар
Глобал Вилдфире Информатион Сйстем (ГВИС) маълумотларига асосланган инфографикага кўра, 2026-йил бошидан 1-августга қадар дунё бўйлаб жами 112,3 миллион гектар майдон ёнғинлар таъсирига учраган. Бу Жанубий Африка Республикаси ҳудудига тенг майдонни ташкил этади.
Ушбу статистикага фақат назоратдан чиққан табиий ёнғинлар эмас, балки қишлоқ хўжалиги ерларини ёқиш ва режалаштирилган бошқариладиган ёқиш ишлари ҳам киритилган.
**Ёнғинлар майдонининг ярмидан кўпи Африкага тўғри келади**
2026-йил бошидан буён дунёда ёнган майдонларнинг ярмидан кўпи Африка қитъаси ҳиссасига тўғри келган. Айниқса, Саҳрои Кабирдан жанубда жойлашган мамлакатларда ерларни тозалаш, яйловларни бошқариш ва далаларни экишга тайёрлаш мақсадида мавсумий ёқиш амалиёти кенг тарқалган.
Мамлакатлар орасида Конго Демократик Республикаси 13,6 миллион гектар ёнган майдон билан биринчи ўринда туради. Бу тахминан Англия ҳудудига тенг. Кейинги ўринларни Ангола (7,5 миллион гектар), Жанубий Судан (7 миллион гектар) ва Марказий Африка Республикаси (6 миллион гектар) эгаллаган.
**Австралия дунёда иккинчи ўринда**
Африкадан ташқари энг катта ёнган майдон Австралияда қайд этилган бўлиб, у 11,8 миллион гектарни ташкил этади. Бу кўрсаткич билан Австралия Конго Демократик Республикасидан кейин дунёда иккинчи ўринда туради. Шунингдек, Океаниядаги ёнган майдонларнинг деярли барчаси Австралия ҳиссасига тўғри келади. Умуман олганда, Океания дунёда ёнғинлар қамраб олган майдоннинг қарийб 11 фоизини ташкил этади.
**Осиёда Мянма етакчи**
Осиё ҳиссасига дунё бўйлаб ёнган ерларнинг тахминан 18 фоизи тўғри келган. Қитъада Мянма 4,3 миллион гектар билан биринчи ўринни эгаллаган. Ҳиндистонда 4 миллион гектар майдон ёнган. Таиланд, Лаос ва Хитойда эса ёнғинлар қамраб олган майдон ҳар бир мамлакатда 2,3 миллиондан 2,7 миллион гектаргача бўлган.
**АҚШ ва Канадада ҳам йирик ёнғинлар кузатилди**
Канадада 1-августга қадар қарийб 2 миллион гектар майдон ёнган. Ёнғинлар мамлакатнинг бир нечта провинсияларида давом этган. АҚШда эса ёнган майдон 2,4 миллион гектарга етган. Айниқса, Орегон ва Вашингтон штатларида йирик ўрмон ёнғинлари кузатилган. Август бошида мамлакат бўйлаб бир вақтнинг ўзида 100 дан ортиқ йирик ёнғин фаол бўлган. Узоқ йиллик статистика АҚШда ёнғинлар сони камайиб бораётган бўлса-да, улар қамраб олаётган умумий майдон кенгайиб бораётганини кўрсатмоқда.
**Европада асосий улуш Россия ҳиссасига тўғри келди**
Европа ҳиссасига дунёда ёнган майдонларнинг қарийб 3 фоизи тўғри келган. Қитъадаги асосий кўрсаткич Россия ҳиссасига тўғри келиб, ёнғинлар қарийб 3,3 миллион гектар ҳудудни қамраб олган. Испанияда эса экстремал иссиқ ва қурғоқчилик сабаб 1-августга қадар қарийб 180 минг гектар майдон ёнган. Авила провинсиясидаги ёнғин мамлакат тарихидаги энг йирик ёнғинга айланган. Шу даврда Франсияда ҳам йирик ёнғинлар кузатилган. Испания ва Франсияда ёнғинлар туфайли эвакуация қилинганлар сони жами 300 минг кишидан ошган.
**Жанубий Америкада Венесуела биринчи**
Жанубий Америка ҳиссасига жаҳондаги ёнган майдонларнинг қарийб 7 фоизи тўғри келган. Минтақада Венесуела 3 миллион гектар билан биринчи ўринни эгаллаган. Бразилияда эса ёнғинлар 2 миллион гектар майдонни қамраб олган.
Мутахассислар ёнган майдон ҳажмининг ўзи ёнғинларнинг хавфлилиги ёки кучини тўлиқ акс эттирмаслигини таъкидлайди. Чунки ГВИС статистикасига табиий ёнғинлар билан бирга қишлоқ хўжалиги ва бошқа мақсадларда режали равишда амалга оширилган ёқишлар ҳам киритилган.