Embraer Ўзбекистон Ҳарбий-ҳаво кучлари учун биринчи C-390 ҳарбий-транспорт самолётини тақдим этди
Бразилиянинг Embraer компанияси Ўзбекистон Ҳарбий-ҳаво кучлари учун мўлжалланган илк C-390 Millennium ҳарбий-транспорт самолётини намойиш этди. C-390 харид қилиниши ҳақида февраль ойида маълум бўлган эди. Ўзбекистон Марказий Осиёда ушбу турдаги самолётларнинг биринчи буюртмачиси ва операторига айланади.
Embraer Ўзбекистон Ҳарбий-ҳаво кучлари учун биринчи C-390 ҳарбий-транспорт самолётини намойиш этди
Бразилиянинг Embraer авиасозлик компанияси Ўзбекистон Ҳарбий-ҳаво кучлари учун мўлжалланган биринчи C-390 Millennium ҳарбий-транспорт самолётини тақдим этди.
Компания томонидан эълон қилинган фотосуратларда самолёт кулранг рангда, UZ AIR FORCE ёзуви, Ўзбекистон байроғи ва мамлакат ҲҲКнинг таниш белгилари билан кўрсатилган. Дум қисмида UK 39010 рақами кўрсатилган.
«Бугун Embraer Ўзбекистон Ҳарбий-ҳаво кучларининг биринчи C-390 Millennium самолётини тақдим этмоқда, бунинг натижасида Ўзбекистон Республикаси Марказий Осиёда C-390 нинг биринчи буюртмачисига айланмоқда», — дейилади компания хабарида.
Ўзбекистон томонидан C-390 Millennium сотиб олиниши ҳақида февраль ойида Singapore Airshow халқаро авиасалонида маълум бўлган эди. Ўшанда Embraer Ўзбекистон ушбу самолётларнинг илгари номи ошкор этилмаган буюртмачиси эканини маълум қилганди.
Самолётлар биринчи навбатда транспорт ва гуманитар миссиялар учун мўлжалланган. Ўзбекистон томонидан буюртма қилинган C-390 сони ва шартнома қиймати ошкор этилмаган.
C-390 Millennium — юк кўтариш қуввати 26 тоннагача бўлган ҳарбий-транспорт самолёти. Унинг максимал крейсерлик тезлиги тахминан 470 узел (тахминан 870 км/соат)ни ташкил этади. Самолёт ҳарбий хизматчилар ва юкларни ташиш, техника ва шахсий таркибни десант қилиш, тиббий эвакуация, қидирув-қутқарув ва гуманитар операцияларни амалга ошириш, шунингдек, ёнғинларни ўчиришга қодир. У, жумладан, вақтинчалик ва тупроқли учиш-қўниш йўлакларидан фойдаланишга мослаштирилган.
Тез ечиб олинадиган ускуналарга эга KC-390 версияси ҳавода бошқа самолётларга ёқилғи қуйиш, шунингдек, парвоз пайтида ўзи ҳам ёқилғи қабул қилиши учун ишлатилиши мумкин.
Ҳозирда Ўзбекистон ҲҲК Ил-76 ва CASA C-295 ҳарбий-транспорт самолётларидан фойдаланмоқда.