Эфиопиядаги «қирғин»да 60 дан ортиқ христиан ўлдирилди, дейди штиркoв расмийси

Эфиопиядаги «қирғин»да 60 дан ортиқ христиан ўлдирилди, дейди черков расмийси

Эфиопия Ортодокс Тевахедо черковига кўра, сўнгги пайтларда христианларга қарши ҳужумлар кўпайган

Эфиопиянинг Оромия минтақасида христианларга қилинган бир қатор ҳужумларда 60 дан ортиқ киши ўлдирилди, деб хабар бермоқда мамлакат Ортодокс черкови.

75 ёшли отаси ўлдирилган маҳаллий сокинлардан бири бу ҳужум пистирма бўлганини айтди. «Биз мутлақо тайёр эмас эдик ва олдиндан ҳеч нарса билмасдик. Улар бизни тўрт томондан қуршаб олишди», — деди у BBC Amharic хизматига.

Минтақавий ҳукумат айбдорларга қарши чора кўришини билдирди.

Маҳаллий расмий ҳужумларда янги ташкил этилган исёнчилар коалицияси — таркибига Оромо озодлик армияси (OLA) кирувчи «Яшаб қолиш альянси»ни айблади. OLA изоҳ бермади, аммо илгари содир этилган бу каби ҳужумларни амалга оширганини рад этган эди.

Эфиопия Ортодокс Тевахедо черкови Муқаддас Синодининг баёнотида айтилишича, ҳужумлар пайтида 20 та уй бутунлай ёниб кетган. Баёнотда бунга ким масъул экани айтилмаган.

Гувоҳлардан бири BBC Amharic хизматига ҳалок бўлганларнинг беш нафари болалар эканини айтди.

Черков расмийси Ширка туманидаги учта ҳудудга қилинган ҳужумларни «қирғин» деб таърифлади ва хавфсизлик кучлари воқеа жойига етиб келгани, аммо ҳужумни тўхтата олмаганини айтди.

Ҳозирда кўплаб аҳоли бу ҳудудни тарк этган.

Зўравонликни қоралаган Ортодокс черкови сўнгги пайтларда христианларга қарши ҳужумлар кўпайганини ва «бундай ҳаракатлар мамлакатнинг ўзаро ҳурмат ва тинч-тотув яшаш қадриятларига путур етказишини» билдирди.

Фэйсбукда жойлаштирилган баёнотида Ортодокс черкови беқарорлик бўйича хавотирларини ҳукуматнинг турли даражадаги масъуллари олдида бир неча бор кўтарганини, аммо «ҳозиргача ҳеч қандай ечим бўлмаганини» айтди.

Эфиопия Инсон ҳуқуқлари кенгаши нодавлат ташкилотининг 2026 йил июль ойида эълон қилинган ҳисоботида айтилишича, сўнгги тўрт йил давомида ушбу ҳудуддаги ҳужумларда 458 киши ўлдирилган.

Аммо бу ўша даврдаги энг қонли ҳужумлардан биридир.

Ҳисоботда айтилишича, қуролланган гуруҳлар маҳаллий жамоаларни, хусусан, Эфиопия Ортодокс Тевахедо черкови эътиқод қилувчиларини диний сабаблар билан амалга оширилган ҳужумларда қайта-қайта нишонга олган.

Ҳукумат илгари ҳужумларда OLA’ни айблаган, Бош вазир Абий Аҳмед эса тинч аҳоли ва диний муассасаларга қаратилган зўравонликлар мамлакатни беқарорлаштириш режасининг бир қисми эканини айтган эди.

Оромо халқига кўпроқ ҳуқуқлар берилиши учун курашаётганини айтадиган бу гуруҳ ушбу айбловларни рад этади.

Аввалги ҳисоботларда ҳудуддаги мусулмонларга қарши ҳужумлар ҳам ҳужжатлаштирилган. BBC билан турли вақтларда суҳбатлашган аҳоли бу зўравонликларни ҳам этник, ҳам диний хусусиятга эга деб таърифлашган.

Эфиопияликларнинг ярмидан кўпи (тахминан икки уч қисми) христианлар (асосан ортодокслар), учдан бир қисми эса мусулмонлардир.