Эфиопия исёнчи кучлари Тиграй вилояти пойтахтидан чекинмоқда
Мекеледаги икки нафар маҳаллий турғун BBC’га ҳукуматпараст кучлар шаҳарни назорат остига олганини маълум қилди.
Эфиопия исёнчи кучлари Тиграй вилояти марказидан чекинмоқда
Эфиопия шимолидаги Тиграй вилоятидаги исёнчи кучлар миллий армия билан жанглар шаҳарга яқинлашиб қолгани сабабли вилоят маркази Мекеле шаҳрини вақтинча тарк этганликларини маълум қилишди.
Вилоятни бошқариб келаётган Тиграй халқ озодлик фронти (ТХОФ) тинч аҳоли учун хавф-хатардан хавотир туфайли чекинишга қарор қилганини билдирди.
Мекеленинг икки нафар турғуни BBC’га ҳукуматпараст кучлар ҳозирда шаҳарни назорат қилаётгани ва ТХОФ жангчилари у ерни тарк этганини айтди. Шунингдек, бир яшовчи шаҳарнинг айрим қисмларида мобил алоқа қайта тикланганини маълум қилди.
Сўнгги ҳафталарда Эфиопия шимолидаги Тиграй, Афар ва Амҳара вилоятларининг айрим қисмларида ТХОФ ва федерал ҳукумат кучлари ҳамда уларнинг иттифоқчи жангчилари ўртасида тўқнашувлар бошланди.
Бу қадам можародаги жиддий бурилишдан далолат беради ва кузатувчилар ўртасида жанглар Африка шохидаги вазиятни янада беқарорлаштириши, эҳтимол қўшни давлатларни ҳам унга тортиши мумкинлиги ҳақидаги хавотирларни кучайтирди.
АҚШ Давлат департаменти якшанба куни Мисрда Эфиопиянинг айрим қўшнилари раҳбарлари иштирокида бўлиб ўтадиган можаро бўйича дипломатик учрашув олдидан барча томонларни «вазминлик» ва «мулоқот»га чақирди.
Тиграй аҳолиси 2022 йилда Африка иттифоқи (АИ) восичилигида икки томон ўртасида тинчлик битими — Претория келишуви имзоланиши билан якунланган вайронкор икки йиллик фуқаролар урушидан кейин ҳаётни қайта тиклашга ҳаракат қилмоқда эди.
Бироқ сўнгги олти ой ичида муносабатлар ёмонлашди ва ҳар икки томон бир-бирини келишувни бузишда айблади.
Ўтган ойда ТХОФ яна олтита қуролли ҳаракат, жумладан Амҳаранинг «Фано» дунёвий қўшини билан бирлашиб, Эфиопия Бош вазири Абий Аҳмед ҳукуматини ҳокимиятдан ағдаришни ўз олдига мақсад қилган иттифоқ тузди.
Фуқаролар уруши ушбу асрнинг энг қонли можароларидан бири бўлди — АИ восичисининг ҳисоб-китобларига кўра, жанглар вилоятни очлик ёқасига олиб келган бир пайтда 600 000 га яқин одам ҳалок бўлган.
Жума куни Аддис-Абеба Асмарани янги исёнчилар иттифоқини қўллаб-қувватлашда айблаганидан кейин Эфиопия ва Эритрея дипломатик алоқаларни узди — Эритрея бу айбловни рад этди.
Эфиопия, шунингдек, Мисрни исёнчиларни қўллаб-қувватлашда айблаб, мисрлик дипломатни чиқариб юборди, Қоҳира эса бунга жавобан Эфиопия элчихонаси ходимига худди шу муддат ичида мамлакатни тарк этишни буюрди.
Бирлашган Миллатлар Ташкилоти Эфиопия шимолида хавфсизлик вазиятининг ёмонлашуви гуманитар операцияларга жиддий тўсқинлик қилаётганидан огоҳлантирди ва барча томонларни муҳтож одамлар учун хавфсиз ва тўсиқсиз киришни таъминлашга чақирди.