Эфиопиянинг еттита исёнчи гуруҳи янги альянс тузди
Бу гуруҳлар Эфиопиянинг энг сераҳоли ҳудудларида йиллардан бери фаол бўлиб келган ва эндиликда биргаликда ишлашларини айтмоқда.
Эфиопиянинг еттита исёнчи гуруҳи янги альянс тузди
Шимолий Тиграй минтақасида кескинлик яна кучайди
Эфиопиянинг еттита исёнчи гуруҳи Аддис-Абебадаги ҳукуматни ағдариш ва ўтиш даври маъмуриятини тузишни талаб қилишга қаратилган альянс тузганликларини маълум қилди.
Коалиция Амхарадаги «Фано» халқ лашкарлари, Оромо озодлик армияси (OLA), Тиграй халқ озодлик фронти (TPLF) ва яна тўртта кичикроқ гуруҳни «Яшаб қолиш учун альянс» деб номланган блок остида бирлаштиради.
Гуруҳлар Бош вазир Абий Аҳмед ҳукуматини «уруш, геноцид, оммавий вайронагарчилик ва ўта қашшоқликка» йўл қўйганликда айбламоқда ва Эфиопия парчаланиб кетиш хавфи остида эканини айтмоқда.
Федерал расмийлар ҳозирча бунга изоҳ бермади.
Эфиопия мамлакатнинг энг кўп аҳоли яшайдиган штатлари бўлмиш Оромия ва Амхарада йиллар давомида қуролли тўқнашувларни бошдан кечирди.
Шунингдек, юз минглаб одамларнинг ҳалок бўлишига ва миллионлаб одамларнинг уй-жойини тарк этишига сабаб бўлган икки йиллик фуқаролар уруши юз берган шимолий Тиграй минтақасида ҳам янги кескинлик юзага келди.
Африка Иттифоқининг тинчлик битими 2022 йилда ушбу урушга чек қўйган эди, бироқ ҳар икки томон бир-бирини келишувни бузишда айблаб, кенг кўламли жангларнинг қайта бошланиши хавфи сақланиб қолмоқда.
Оромия, Амхара ва Тиграйдан ташқари, янги альянс таркибига яна учта минтақа — Огаден, Афар ва Бенишангул-Гумузда жойлашган гуруҳлар ҳам киради, бу эса у Эфиопиянинг 12 та минтақавий штатидан ярмини қамраб олишини англатади.
Амхаранинг «Фано» гуруҳи Тиграй уруши пайтида федерал кучлар билан биргаликда жанг қилган эди.
Бироқ, уруш тугаганидан кейин бир йил ўтмай, у ҳукуматнинг қуролсизланиш ҳақидаги буйруқларини бажаришдан бош тортиб, федерал ҳукуматга қарши қуролли исён кўтарди.
Ҳукумат 2018 йилдан бери OLA гуруҳига қарши курашиб келмоқда.
«Яшаб қолиш учун альянс» коалицияси тузилгани ҳақидаги эълон TPLF ва қўшни Эритрея ўртасидаги тахмин қилинаётган альянс ҳақидаги хабарлардан бир неча ой ўтиб янгради.
Абий Эфиопиянинг «мудофаа қобилиятига» ишончи комил эканини айтди.
«Ҳатто бошқалар қўшилса ҳам, Эфиопия суверенитети борасида заррача қўрқувимиз йўқ», деди у июль ойида қонун чиқарувчиларга.
Мамлакатда июнь ойида умумий сайловлар бўлиб ўтди ва овоз бериш жараёни можаролар, таъқиблар ҳақидаги айбловлар ва мухолифат партияларининг чекланган иштироки соясида қолганига қарамай, Абийнинг «Фаровонлик» партияси парламентдаги мутлақ кўпчилик ўрнини сақлаб қолди.
«Фано» ва OLA исёнчи гуруҳлари сайловни ва унинг натижаларини рад этди.
Тиграй минтақаси ва унинг олти миллион аҳолиси овоз бериш жараёнидан бутунлай четда қолди.