Эбола эпидемияси бутун Африкага таҳдид солмоқда – ЖССТ
Жаҳон соғлиқни сақлаш ташкилоти (ЖССТ) раҳбари Тедрос Гебреесус Эбола безгаги эпидемияси бутун Африкага таҳдид солаётганини маълум қилди.
Эбола эпидемияси бутун Африкага хавф солмоқда – ЖССТ
«Касаллик тарқалишининг барча занжирлари топилиб, узилмагунча, эпидемия давом этаверади ва Конго, унинг қўшнилари ҳамда бутун минтақа учун таҳдид бўлиб қолади», – деди ЖССТ раҳбари.
Унинг айтишича, ўлим ҳолатларининг аксарияти касаллик билан алоқада бўлган деб ҳисобланмаган одамлар орасида қайд этилган.
«Бу бизга номаълум бўлган инфексия юқиш занжирлари мавжудлигини англатади. Вафот этганларнинг кўпчилиги ҳанузгача хавфли усулларда дафн этилмоқда, бу эса инфексиянинг янада тарқалишига сабаб бўляпти», – дея таъкидлади Тедрос Гебреесус.
У халқаро ҳамжамиятни Конго ҳукумати томонидан ишлаб чиқилган ва 1,3 млрд доллар талаб этиладиган Эбола эпидемиясига қарши кураш режасини молиялаштиришни ошириш ва тезлаштиришга чақирди.
Эбола вирусининг Бундибугё тури келтириб чиқарган ушбу эпидемия 2018–2020-йиллардаги эпидемиядан ҳам ошиб кетиб, Конго тарихидаги энг йирик ва энг кўп ўлимга олиб келган ҳолатга айланди. Ҳозир у 2014–2016-йилларда Ғарбий Африкада 30 мингга яқин одамнинг касалланишига ва Гвинея, Либерия ҳамда Серра-Леонеда 11 мингдан зиёд кишининг ўлимига сабаб бўлган эпидемиядан кейин иккинчи ўринда туради.
ЖССТ октабр-ноябр ойларида потенсиал ваксиналар самарадорлиги бўйича клиник синовларни бошлашни режалаштирмоқда, даволаш усуллари бўйича синовлар эса аллақачон олиб борилмоқда.
Май ойида ЖССТ КДР ва Угандадаги касаллик авж олишини халқаро аҳамиятга молик жамоат соғлиғи учун фавқулодда вазият деб эълон қилган эди. Ташкилотнинг маълум қилишича, генетик таҳлил (секвенирлаш) эпидемиянинг бир неча ой аввал, яъни январ-феврал ойларида бошланганини кўрсатган.