Дунёнинг энг гўзал аёллари рейтинги янгиланди. Биринчи ўринни таиландлик актриса забт этди
Дунёнинг энг гўзал аёллари рейтингида таиландлик актриса биринчи ўринни эгаллади.
17-август куни АҚШнинг Тҳе Нетизенс Репорт рақамли медиа ташкилотига тегишли Нетизенс Чоисе платформаси бир неча ой давомида ўтказилган глобал сўровнома натижаларини эълон қилди. Унда интернет фойдаланувчиларидан 2026-йилнинг “дунёдаги энг чиройли аёли”ни танлаш сўралган эди.
**Тарихдаги энг юқори натижа**
Сўровномада Линглинг Сирилак Квон 22 миллиондан ортиқ овоз тўплаб, биринчи ўринни эгаллади. У, шунингдек, 10 миллиондан ортиқ овоз билан “2026-йилнинг энг чиройли таиландлик актрисаси” деб ҳам топилди. Бу 2022-йилдан бери ўтказиб келинаётган йиллик сўровнома тарихидаги энг юқори натижа бўлди.
**Иккинчи ва учинчи ўринни эгаллаган туркиялик актрисалар**
Иккинчи ўринни 2025-йилги ғолиб – туркиялик актриса Сила Туркоғлу 18,5 миллион овоз билан банд этди. Учинчи ўринни эса 2024-йилги ғолиб, туркиялик актриса Яғмур Юксел эгаллади.
**Етакчилик қилаётган таиландлик гўзаллар**
Бу йил Таиланд шоу-бизнеси вакиллари дунёнинг энг чиройли 20 аёли рейтингида сезиларли даражада устунлик қилди. Рўйхатга Линглингдан ташқари Орм Корннапат (4-ўрин), Фрин Сароча (15-ўрин), Бекки Армстронг (17-ўрин), Ёко Апасра (18-ўрин) ҳам кирди.
**Хитойлик энг гўзал актриса ким?**
Хитойлик актриса Дилрабо Дилмурат эса 3,2 миллиондан ортиқ овоз билан “2026-йилнинг энг чиройли хитойлик актрисаси” деб топилди. Бу номинация илк бор ўтказилгани сабабли, у ушбу унвоннинг биринчи соҳибасига айланди.
Дилмурат жаҳон рейтингида ҳам 3,3 миллиондан ортиқ овоз билан 7-ўринни эгаллади. “Уч ҳаёт, уч олам: Уйқу китоби” филми юлдузи 6-ўриндаги Бай Лудан анча ортда қолди – Бай Лу 8 миллиондан ортиқ овоз тўплаган эди. Бироқ Хитойнинг ўзида ўтказилган сўровномада Бай Лу учинчи ўринни эгаллади.
**Кучли йигирматалик**
Дунёнинг энг чиройли 20 аёли қаторидан жой олганлар: туркиялик Су Буржу Язги Жошкун (5-ўрин), Илсу Демиржи (8-ўрин), Скарлетт Ёханссон (9-ўрин), Жемре Арда (10-ўрин), нигериялик хонанда Тива Севидж (11-ўрин), Риҳанна (12-ўрин), Белла Ҳадид (13-ўрин), К-поп юлдузи Ниннин (14-ўрин), жанубий африкалик хонанда Тайла (16-ўрин), туркиялик актриса Синем Унсал (19-ўрин), Сидней Суини (20-ўрин).
**Линглинг Сирилак Квон ким?**
Маълумотларга кўра, Линглинг 1995-йилда туғилган бўлиб, хитой-тай илдизларига эга. Унинг отаси Гонконгдан, онаси эса Таиланднинг Каласин провинсиясидан. 31 ёшли актриса отасининг ватанида туғилиб, 17 ёшида Таиландга кўчиб ўтган. Шу сабабли у кантон, мандарин, инглиз ва тай тилларида эркин сўзлаша олади.
У университетда туризм йўналишида таҳсил олган. Фаолиятини гўзаллик танловларидан бошлаган ва кейинчалик Чаннел 3 телеканали билан шартнома имзолаб, актрисалик фаолиятини бошлаган.
Линглингга катта машҳурлик 2024-йилда чиққан “Бизнинг сиримиз” сериалидаги роли орқали келган. Шундан сўнг у Таиланд шоу-бизнесининг энг талабгир актрисаларидан бирига айланган.
**Қимматбаҳо брендлар билан ишлаган**
Ҳозирги кунда у Диор бренди юзи, шунингдек, БЙД автомобил компаниясининг Таиланддаги илк вакили бўлди. Унинг реклама лойиҳалари ҳашаматли маҳсулотлар, автомобиллар, косметика ва кўчмас мулк каби турли соҳаларни қамраб олади. Актриса Вогуе Ҳонг Конг ва Вогуе Тҳаиланд каби нуфузли журналлар учун ҳам суратга тушган.
**Актриса бўлишни орзу ҳам қилмаган**
Актриса шоу-бизнесга киришдан олдин актёр бўлишни орзу қилмаганини айтган. “Аввалига тай тилида яхши гапира олмасдим, актёрлик тажрибам умуман йўқ эди. Ҳатто тай сериалларини томоша қилишга ҳам одатланмагандим”, деган Линглинг.
Шунга қарамай, у ўз устида ишлаб, қисқа вақт ичида Таиланддаги машҳур актрисалардан бирига айланган.
Маълумотларга кўра, Линглинг агар шоу-бизнесга кирмаганида, ўзининг севимли соҳаси – бизнес билан шуғулланган бўларди. У ўзи ишлаб чиқарган маҳсулотлардан бошқалар фойдаланаётганини кўришни ёқтиришини айтган. Бундан ташқари, Линглинг укаси билан бирга Бангкокда “Гуан Жи” ресторанини очган. У шунингдек, турли ширинликлар ҳам сотади.