Дунёдаги иккинчи энг йирик олмос ниҳоят сотилди
**Дунёдаги иккинчи йирик олмос – "Моцведи" ниҳоят харидорини топди**
Боцванада топилган, оғирлиги 2488,32 карат бўлган "Моцведи" олмоси деярли икки йиллик кутишдан сўнг сотилди. Бу ҳақда Бусинесс Инсидер Африса хабар берди. Карове конида 2024-йил август ойида топилган ушбу тош дастлаб 2492 карат деб эълон қилинган эди, бироқ тозаланиб, ишлов берилгач, унинг якуний оғирлиги 2488,32 каратни ташкил этди.
Америка Гемология Институти "Моцведи"ни инсоният тарихида топилган иккинчи энг йирик заргарлик олмоси деб тан олган. Биринчи ўринда эса 1905-йилда Жанубий Африка Республикасида топилган, оғирлиги 3106 карат бўлган машҳур "Куллинан" олмоси туради.
Бусинесс Инсидер Африса нашрининг ёзишича, Канаданинг Лусара Диамонд кончилик компанияси ўзининг 2026-йил иккинчи чораги бўйича ҳисоботида ушбу сотув ҳақида маълум қилган. 7-августдаги ҳисоботда "Моцведи" олмоси компаниянинг чораклик даромади таркибига киритилган бўлиб, умумий даромад 41 миллион долларни ташкил этган. Бироқ Лусара компанияси "Моцведи"нинг харидорини ҳам, унинг аниқ нархини ҳам ошкор этмади.
Бундай улкан ҳажмдаги олмосни сотиш жараёни мураккаб кечди, чунки бозорда жуда йирик тошларнинг нархини белгилаш учун аниқ мезонлар мавжуд эмас. Олмос эгаси уни бир нечта қимматбаҳо олмосларга бўлиши ёки ноёб коллексия буюми, ёхуд музей экспонати сифатида бутунича сақлаб қолиши мумкин эди.
"Моцведи" ўзининг юқори сифати билан ҳам ажралиб туради. Гемология институти уни шаффоф, оч жигарранг тусдаги ва заргарлик сифатига эга олмос деб таърифлади. Шунингдек, институт тошни кам нуқсонли яхлит кристалл эканини билдирди. Аввалроқ Ню-Ёрк мери Зоҳран Мамдани Британиядан Кўҳинур олмосини Ҳиндистонга қайтаришни сўрагани ҳақида хабар берилганди.