«Док-1 Макс» иши бўйича жабрланувчиларга белгиланган 78 миллиард сўмдан қарийб 17 миллиард сўм тўлаб берилди

«Док-1 Макс» иши бўйича жабрланувчиларга белгиланган 78 миллиард сўмдан қарийб 17 миллиард сўми ўтказиб берилди

«Док-1 Макс» препаратидан жабрланганларга етказилган зарарни қоплаш учун 16,7 миллиард сўм тўланди, бироқ қолган суммани ундириш бўйича ижро чоралари давом этмоқда. Жами суд ҳужжатларида 85 нафар фуқаро фойдасига умумий қиймати 78 миллиард сўмлик зарарни ундириш кўзда тутилган.

Мажбурий ижро бюроси хабар беришича, маблағлар Фармацевтика тармоғини ривожлантириш агентлигининг судланган собиқ раҳбари Сардор Кариевнинг аукционда сотилган мол-мулкидан, шунингдек, унинг оила аъзолари томонидан киритилган пуллар ҳисобидан келиб тушган.

Хусусан, савдоларда «Бешёғоч» маҳалласининг Фурқат кўчасида жойлашган нотурар жой биноси сотилган. Уни сотишдан 793 миллион сўм тушган. Бундан ташқари, Кариевнинг Чилонзор тумани Қатортол кўчасидаги турар жойлари аукционга қўйилган. Уларнинг қиймати 7,1 миллиард сўмга баҳоланмоқда.

Олинган 16,7 миллиард сўм «Суд ҳужжатлари ва бошқа органлар ҳужжатларини ижро этиш тўғрисида»ги қонуннинг 80-моддасига мувофиқ ундирувчилар ўртасида тенг тақсимланди.

Шу билан бирга, қолган зарарни ундириш бўйича ижро ҳаракатлари давом этмоқда. Ҳозирда гап 61,3 миллиард сўм миқдоридаги сумма ҳақида бормоқда.

Ҳиндистоннинг Marion Biotech компанияси препаратлари, жумладан, «Док-1 Макс» сиропи билан боғлиқ иш камида 69 нафар боланинг ўлимига сабаб бўлган. Яна 18 нафар бола препаратни қабул қилганидан кейин ногирон бўлиб қолган. Суд жараёни давомида айбланувчилар сони 23 кишига етди, ногирон бўлиб қолган болаларга зарар етказиш тўғрисидаги материаллар эса асосий жиноят иши билан бирлаштирилди.

Асосий иш бўйича 2024 йил февраль ойида суд Фармацевтика тармоғини ривожлантириш агентлиги собиқ раҳбари Сардор Кариевни 18 йилга, унинг ўринбосарлари Амирхон Азимов ва Нодирбек Мусаевни 16 йилга, Quramax директори Рагневдра Пратарни эса 20 йилга озодликдан маҳрум қилиш жазосига ҳукм қилган эди.