Converse норозилик тўлқинидан сўнг «қаттиқ ранжитувчи» рекламани олиб ташлади
Ижтимоий тармоқ фойдаланувчилари бренднинг Instagram-аккаунтидаги сурат Ку-клукс-клан (ККК) капоти ва дорга осиш саҳнасига ўхшашлигини айтишмоқда.
Converse ижтимоий тармоқ фойдаланувчилари Ку-клукс-клан тасвирларига ўхшатган сурат туфайли келиб чиққан норозиликлардан сўнг ўз рекламасини қайтариб олди ва «бу борада хатога йўл қўйганлигини» тан олди.
Компаниянинг Instagram аккаунтида жойлаштирилган ушбу сурат, одамлар ундаги ёруғлик туфайли у оқ рангли учли қалпоққа (капюшон) ўхшаб қолганини айтганидан кейин тармоқда танқидларга учради.
Ижтимоий тармоқ фойдаланувчилари, шунингдек, суратда осилиб турган бир жуфт пойабзални линч қилиш (судсиз қатл этиш) қурбонига қиёслашди.
Илк бор жума куни эълон қилинган узр сўраш баёнотида Converse ушбу тасвир компаниянинг ижтимоий тармоқлардаги саҳифаларидан олиб ташланганини ва уни бошқа жойлардан ҳам ўчириш устида ишлаётганини маълум қилди. «Бундай бўлмаслиги керак эди ва биз бундан буён яхшироқ ҳаракат қиламиз», дейилади баёнотда.
Баёнотда шунингдек: «Биз узр сўраймиз. Ушбу тасвир нима учун қаттиқ ғазаб қўзғатганини тушунамиз ва бу борада хатога йўл қўйганимизни тан оламиз», деб қўшимча қилинган.
Шундан сўнг ушбу тасвир Converse компаниясининг ижтимоий тармоқлардаги аккаунтларидан олиб ташланди.
Фотосурат 27 август куни халқаро миқёсда тақдим этилган Chuck 70 X кроссовкалари кампаниясининг бир қисми эди.
Кампанияда Жанубий Кореянинг Aespa K-pop гуруҳи хонандаси Карина иштирок этган бўлиб, у пойабзал рекламалари туркумида намоён бўлади.
Converse компаниясига 1900 йилларнинг бошларида Массачусетс штатида асос солинган бўлиб, унинг машҳурлиги 1917 йилда АҚШ баскетбол майдонларида Chuck Taylor кроссовкалари илк бор пайдо бўлганидан кейин кескин ортиб кетган.
Ушбу глобал бренд 2003 йилдан бери Nike компаниясининг шўъба корхонаси ҳисобланади.