Британия мактабларида украиналик болалар рус тилини ўрганишга мажбурланди. Ҳукумат узр сўради
Украин тилидан имтиҳон топшириш имконияти бўлмагани сабаб Британиянинг айрим мактабларида украиналик қочқин болалар рус тилини ўрганишга мажбурланган. Ҳукумат улардан узр сўраб, 2028-йилдан украин тили бўйича имтиҳон жорий этилишини маълум қилди.
Британия мактабларида украиналик болалар рус тилини ўрганишга мажбур бўлди. Ҳукумат узр сўради
Буюк Британия ҳукумати мактабларда украин тилидан имтиҳон топшириш имкони бўлмагани сабаб рус тилини ўрганишга мажбур қилинган украиналик қочқин болалардан узр сўради.
“Кўплаб ўқувчилар рус тилидан имтиҳон топширишга мажбур бўлган. Улар шундай вазиятга тушиб қолганидан чин дилдан афсусдаман. Энди украин тилидан ГССЕ имтиҳонини топшириш имкониятини яратиш масаласи жуда муҳим”, — деди Гулд.
2022-йилда Россия Украинага кенг кўламли босқин бошлаганидан кейин Буюк Британияга 30 мингдан ортиқ украиналик бола келган. Мамлакатда украин тили бўйича ГССЕ имтиҳони йўқлиги сабабли айрим мактаблар уларни рус тилини танлашга мажбурлаган. 2024-йилда Украина Таълим вазирлиги болаларга босим ўтказилаётгани юзасидан Британия ҳукуматига шикоят қилган.
Янги имтиҳонни ишлаб чиқиш АҚА ташкилотига топширилди. Британия Таълим вазирлиги бунинг учун 340 минг фунт стерлинг ажратди.
Гулд Лондондаги Авлиё Мария украин мактабига ташрифи чоғида 20 ёшли Виталий Андроник билан учрашди. У 15 ёшида рус тилидан имтиҳон топширишга қаттиқ ундалганини айтди.
“Мен учун энди кеч, аммо келажакда келадиган қочқин болалар украин тилини ўрганиш имкониятига эга бўлишини истайман. Бу биз бошдан кечирган руҳий жароҳатларнинг тан олинишини англатади”, — деди у.
2024-йилда Украинанинг Закарпатье вилоятидан Британияга қочиб келган 16 ёшли София Чонка ҳам рус тилини ўрганишдан бош тортганини айтди.
“Тўққизинчи синфда менга рус тилини ўрганишим кераклигини айтишди. Мен эса шунчаки йўқ дедим. Россия билан ҳеч қандай алоқам бўлишини истамадим. Улар юртдошларимни ўлдирди, оила аъзоларимни яралади”, — деди қиз.
Украина жамоат ташкилотлари 2014-йилда Россия Қримни аннексия қилганидан бери Британияда украин тили бўйича ГССЕ имтиҳонини жорий этишга ҳаракат қилиб келган. Ст Марйъс Труст ташкилоти раҳбари Инна Григорович энди украин тилидан А-левел имтиҳонини ҳам жорий эттиришга ҳаракат қилмоқда. Британияда ушбу имтиҳон натижалари университетларга киришда ҳисобга олинади.