Британия Украинага 5 мингта ракета етказиб беришни тезлаштиради
Буюк Британия Украинага аввал келишилган ҳарбий ёрдам пакети доирасида ракеталар етказиб беришни тезлаштиришини тасдиқлади. Киевга келгуси тўрт йил давомида 5 мингта енгил кўп мақсадли ракета - ЛММ етказилиши кўзда тутилган.
Британия Украинага 5 мингта ракета етказиб беришни тезлаштиради
ДВ нашри Политисўга таяниб хабар беришича, бу ҳақда Украина президенти Володимир Зеленскийнинг 14-октабр куни Лондонга ташрифи чоғида маълум қилинган.
Ракеталарни етказиб бериш учун 1,6 миллиард фунт стерлинг, яъни қарийб 1,89 миллиард евро ажратилиши кўзда тутилган. Бу янги буюртма эмас, балки аввал келишилган ёрдам пакетини тезроқ етказиш масаласидир.
Нашрга кўра, ЛММ ракеталари Украина Қуролли кучларига Россия Украина шаҳарларига йўллаётган реактив дронларни уриб туширишда ёрдам беради.
Буюк Британия бош вазири Энди Бёрнем мамлакат Украина армияси учун янги ҳарбий ечимлар ишлаб чиқишда давом этишини билдирган. Жумладан, Британия технологияларини бошқа иттифоқчилар Украинага берган қуролларга мослаштириш режалаштирилмоқда.
Лондон, шунингдек, ҳаво ҳужумидан мудофаа тизимлари учун 45 миллион фунт стерлинглик — 53,2 миллион евролик ракеталар пакетини эълон қилган. Политисо маълумотига кўра, Британия ҳукумати қўшимча молиявий ва ҳарбий ёрдам пакетлари ҳамда Россияга қарши янги санксияларни тайёрламоқда.
Бундан ташқари, Чернобил атом электр стансиясидаги ҳимоя иншоотини таъмирлаш учун 17 миллион фунт стерлинг — қарийб 20 миллион евро ажратилади. Иншоот 2025-йилда Россия дрони ҳужуми оқибатида шикастланган.
Британия ҳукумати зарур таъмирлаш ишлари бажарилмаса, коррозия кўп йиллик халқаро сармоялар натижасига путур етказиши ва атроф-муҳит учун узоқ муддатли хавфлар туғдириши мумкинлигини таъкидлаган.
Зеленскийнинг Лондонга ташрифи Киев ва Вашингтон муносабатларидаги таранглик фонида ўтган. Аввалроқ Доналд Трамп Украина Оқ уйнинг сўровларига қарамай, Россиядаги нефтни қайта ишлаш заводларига зарба беришда давом этаётганини танқид қилган ва мамлакатда янги президентлик сайловлари ўтказишга чақирган эди.
Октабрда Трамп Москва билан Россия ёнилғисига нисбатан санксия чекловларини вақтинча юмшатувчи «дизел келишуви»ни ҳам эълон қилган.
АҚШ президенти Россия ва Украина ўртасида «энергетик сулҳ» ҳақида гапирган бўлса-да, ДВ маълумотига кўра, Москва ҳам, Киев ҳам бундай келишув тузилганини тасдиқламаган. Россия қўшинлари эса Украина энергетика обьектларига баллистик ракеталар билан зарбалар беришда давом этган.