Бразилияда битта ўйинда 53 та қизил карточка кўрсатилди
Бу рекорд натижа бўлиб, олдинги рекорд 36 та қизил карточкадан иборат эди.
Бразилияда бир ўйинда 53 та қизил карточка кўрсатилди
Бразилиянинг Минас-Жерайс штатида 2-дивизион чемпионатининг ярим финалида "Уберландия" ва "Маморе" жамоалари ўртасидаги учрашувда 53 та қизил карточка берилди ва бу жаҳон рекорди бўлди.
Ўйиннинг 54-дақиқасида "Маморе" футболчиси Дави гол ургач, "Уберландия" ўйинчиларига нисбатан провокацион имо-ишоралар қилди ва рақибларни ҳақорат қилди, шундан сўнг оммавий муштлашув келиб чиқди.
Воқеадан кейин ҳакам Фернандо Патрик "Маморе"нинг 21 нафар, "Уберландия"нинг эса 22 нафар ўйинчисини майдондан четлатди. Бундан ташқари, ҳар икки томондан саккизтадан мураббий ва иккита менежер ҳам қизил карточка олди — жами 53 киши.
Шундан сўнг ҳакам "Маморе" фойдасига 3:1 ҳисобида ўйинни тўхтатишга қарор қилди. Ҳисобот варақасида у учрашув энди давом эттирилмаслигини қайд этган. Патрик, шунингдек, "Уберландия" менежери томонидан унга нисбатан таҳдидлар бўйича полицияга ариза берилганини айтди.
Бу учрашув жаҳон футболида энг кўп қизил карточка кўрсатилган ўйин сифатида рекорд ўрнатди. Олдинги рекорд 36 та қизил карточкадан иборат эди. Бу натижа 2011-йил 27-февралда Аргентина лигасининг бешинчи дивизионида "Атлетико Клейпол" ва "Виктория Аренас" ўртасидаги ўйинда қайд этилган.