Бразилияда футболчи голни нишонлаш вақтида туннелга тушиб кетди
У урган гол эса офсайд туфайли бекор қилинди.
Бразилия чемпионатида футболчи голни нишонлаш чоғида туннелга тушиб кетди. Бу воқеа Бразилия А Сериясининг 22-турида "Шапекоенсе"га қарши ўйинда (2:1) "Коритиба" ҳимоячиси Жаси билан содир бўлди. У ўзининг голини нишонлаётган пайтда реклама тахтаси ортидаги туннелга йиқилиб тушди. Футболчи туннелдан чиққанидан сўнг, унинг голи офсайд туфайли бекор қилингани маълум бўлди.
**"Биз доим ҳам гол уравермаймиз"**
Бу ҳолат биринчи бўлим охирида юз берди. Жаси иккинчи қаватда тўп учун курашда ғалаба қозониб, мавсумдаги иккинчи голини урди ва уни фаол нишонлай бошлади: у тўпни "Шапекоенсе" дарвозабонидан олиб, фарзанд кутаётганига ишора қилиб, футболкаси ичига солган.
Шундан сўнг ҳимоячи реклама тўсиғидан сакраб ўтди, аммо унинг ортида трибуналар остига олиб борувчи туннелнинг кириш қисми борлигини пайқамади. Танаффус яқинлашгани сабабли туннел эшиги очиқ эди. Натижада футболчи дарҳол кадрда ғойиб бўлиб, пастга қулади. Туннел кириш жойида турган хавфсизлик хизмати ходими эса бошини чангаллаганча қолди.
Кейин Жаси туннелдан чиқиб келди ва голни нишонлашда давом этди, аммо кўп ўтмай гол "ўйиндан ташқари ҳолат" туфайли бекор қилинди.
Танаффусдаги интервюсида бразилиялик футболчи аҳволи яхши эканини айтди. "Мен билан барчаси жойида. Ҳимоячилар камдан-кам гол уришади, шунинг учун мен берилиб кетдим. Туннел эса очиқ турган экан. Оёғимни текширтираман", – деди у СазеТВ телеканалига берган интервюсида.
Лекин Жаси 48-дақиқада барибир алмаштирилди – йиқилиш чоғида тўпиқдаги лат ейиш ўз сўзини айтди. "Коритиба" эса усиз ҳам ғалаба қозонишни уддалади, Педро Роша ўйин охирида ғалаба голини урди.
**Бу биринчиси эмас**
"Кото Перейра" стадионида шунга ўхшаш ҳолат 2014-йилда ҳам рўй берган эди: ўшанда "Коритиба" ҳужумчиси Жоел "Сан-Паулу" дарвозасига урган голини нишонлаш пайтида реклама шитидан сакраб ўтган ва пастга қулаганди. Ўшанда гол ҳисобга олинган, камерунлик футболчи эса ўйинни давом эттира олганди.
Ла Насион портали қайд этишича, Жасини туннелдан чиқариб олган хавфсизлик хизмати ходими 12 йил олдин ҳам худди шу жойда турган эди. У яна бир бор вирусдек айланаётган видео қаҳрамонига айланди.