Болалар омбудсмани Ангрендаги вақтинчалик сақлаш ҳибсхонасини текширди
Болалар омбудсмани Ангрен шаҳридаги вақтинча сақлаш ҳибсхонасини текширди
Болалар омбудсмани Тошкент вилояти Ангрен шаҳар ИИБ вақтинча сақлаш ҳибсхонасида мониторинг ўрганишини ўтказди. Текширув вақтида муассасада вояга етмаган шахслар йўқ эди.
Инспекция давомида вояга етмаганларни сақлаш учун мўлжалланган камералардаги шароитлар, жумладан, ётоқ жойларининг ҳолати, овқатланишни ташкил этиш, санитария-гигиена нормаларига мувофиқлиги ва тиббий ёрдам кўрсатиш тартиби ўрганилди. Муассаса 51 кишига мўлжалланган бўлиб, унда вояга етмаганлар учун алоҳида камера ажратилган. Текширув якунларига кўра, асосий шароитлар минимал стандартларга жавоб бериши аниқланди, бироқ қатор камчиликлар ҳам қайд этилди.
Хусусан, тиббиёт хонасидаги дори-дармонлар захирасини тўлдириш, муассасани тиббиёт ходими билан таъминлаш ва фойдаланилаётган ётоқ анжомлари тўпламларини янгилаш зарурлиги таъкидланди.
Бундан ташқари, кутубхона фондини янгилаш ва вояга етмаганларнинг қариндошлари билан учрашиши учун алоҳида хона ажратиш эҳтиёжи қайд этилди. Мониторинг натижалари бўйича Болалар омбудсмани муассаса раҳбариятига вояга етмаганлар ҳуқуқларини таъминлаш юзасидан тавсиялар юборди.