Боғдорчиликнинг саломатликка фойдалари аниқланди
Боғдорчиликнинг саломатликка фойдалари аниқланди
Сурункали касалликларга чалинган инсонлар боғдорчилик орқали хавотир ва депрессияни енгиб ўтиши мумкин. Бу ҳақда Фудан университети ва Истван Сеченьи университети олимлари ўтказган тадқиқотлардан маълум бўлди.
Мутахассислар жами 4 535 нафар иштирокчи қатнашган 23 та илмий тадқиқот натижаларини таҳлил қилди. Хулосалар БМС Публис Ҳеалтҳ журналида эълон қилинди.
Боғдорчилик терапияси ўсимликлар ва тупроқ билан мунтазам шуғулланишни, жумладан экин экиш, суғориш ва ҳосил йиғишни ўз ичига олади. Бундай дастурлар жисмоний фаоллик, мулоқот ва табиат билан алоқани қўллаб-қувватлаш усули сифатида қаралади. Буюк Британияда бу каби машғулотлар беморларга ижтимоий терапия сифатида тавсия этилиши мумкин.
Олимлар камида битта сурункали касаллик ташхиси қўйилган катта ёшли одамлар иштирок этган тадқиқотларни ўрганди. Улар орасида юрак-қон томир касалликлари, қандли диабет, семизлик, сурункали оғриқ, когнитив бузилишлар ва саратон билан яшаётганлар бор эди. Иштирокчиларнинг ўртача ёши қарийб 54 ёшни ташкил этган, уларнинг учдан икки қисми аёллар бўлган.
Таҳлил боғдорчилик дастурларида қатнашганларда руҳий саломатлик кўрсаткичлари ўртача даражада яхшиланганини кўрсатди. Иштирокчилар хавотир ва депрессия аломатлари камайганини билдирган. Айниқса, кексалар ва когнитив бузилишлардан азият чекадиган беморлар қатнашган айрим тадқиқотларда бу натижа яққол намоён бўлган.
Шу билан бирга, боғдорчиликнинг жисмоний саломатликка таъсири анча паст бўлиб чиқди. Муаллифлар артериал қон босими ва когнитив кўрсаткичларда сезиларли ўзгаришларни аниқламади. Ҳаёт сифати, уйқу ва ижтимоий алоқалардан иборат умумий саломатлик кўрсаткичларида эса камроқ ижобий ўсиш қайд этилди.
Тадқиқотчилар боғдорчилик дастурларини ўзаро таққослаш осон эмаслигини ҳам таъкидламоқда, чунки улар давомийлиги, интенсивлиги ва ўтказилиш шакли жиҳатидан бир-биридан фарқ қилган. Бундан ташқари, айрим тадқиқотларда методологик камчиликлар бўлган, шунингдек, иштирокни муддатидан олдин тўхтатганлар кўплиги ҳам натижаларга таъсир қилган бўлиши мумкин.
Муаллифлар фикрича, боғдорчилик терапияси самарадорлигини баҳолаш учун янада сифатли тадқиқотлар керак. Ҳозиргача олинган маълумотлар эса бу усул сурункали жисмоний касалликларни мустақил даволашдан кўра, кўпроқ руҳий фаровонликни қўллаб-қувватлашга ёрдам беришини кўрсатмоқда.