Биринчи қаватлардаги бизнесни хонадонларни нотурар жой фондига ўтказиш талабидан озод қилмоқчи бўлишяпти
Бизнесни биринчи қаватлардаги турар жойларни нотурар жой тоифасига ўтказмасдан ташкил этишга рухсат бериш таклиф этилмоқда
Ўзбекистонда кўп квартирали уйларнинг биринчи қаватларида бизнес юритиш қоидаларини ўзгартириш таклиф этилди. Тадбиркорларга турар жойларни нотурар жой тоифасига ўтказмасдан, у ерда айрим турдаги савдо ва хизмат кўрсатиш шохобчаларини жойлаштиришга рухсат бериш режалаштирилмоқда. Бунинг учун фақатгина хабарнома юбориш кифоя бўлиши назарда тутилган.
Президент матбуот хизматининг хабар беришича, гап сартарошхоналар, гўзаллик салонлари, кичик дўконлар, ательелар, пойабзал ва маиший техника таъмирлаш устахоналари ҳақида бормоқда.
Ҳозирги вақтда биринчи қаватдаги квартирадан бундай фаолият учун фойдаланмоқчи бўлган тадбиркорлар хонадонни турар жой фондидан нотурар жой фондига ўтказишлари шарт. Бунинг учун келишиш ва рухсатномалар олиш тартиб-таомиллари кўзда тутилган.
Янги тартиб муайян бизнес турлари учун ушбу тартиб-таомилдан воз кечиш имконини бериши керак. Бунда рухсат этилган хизматларнинг аниқ рўйхати ва хавфсизлик талаблари ҳали белгиланиши лозим.
Мутасаддиларга бир ой муддатда тегишли рўйхатни ишлаб чиқиш, шунингдек, бино ва иншоотлар жавоб бериши керак бўлган талабларни белгилаш топширилди.