Бевақт вафот этган актёр, узоқ кутилган тўй, рейтинг учун кураш — Турк сериаллари оламидаги янгиликлар
Бевақт вафот этган актёр, узоқ кутилган тўй, рейтинг учун кураш — Турк сериаллари оламидаги янгиликлар
Турк сериаллари оламида яна бир ҳафта воқеаларга бой кечди. Янги лойиҳаларнинг бош роллари белгиланди, машҳур актёрлар узоқ кутилган тўйларини нишонлади, санъат аҳли эса оғир йўқотиш билан юзлашди. Шу билан бирга, рейтинглар учун кураш ҳам тобора кескинлашмоқда. Келинг, турк шоу-бизнесида сўнгги етти кун ичида нималар юз берганини биргаликда эслаб чиқамиз.
Яқин кунларда “Қурғоқчил ёз” номли янги турк сериалини суратга олиш ишлари бошланади. Ушбу кинокартина Нежоти Жумалининг машҳур романи асосида экранлаштирилган. Бош ролларни Мерт Рамазон Демир ва Лизге Жўмерт ижро этиши маълум бўлди. Аввалроқ Мерт Рамазон қаҳрамони Усмоннинг акаси ролини Каан Урганжиўғли ўйнаши мумкинлиги ҳақида хабар берилган эди, бироқ кейинроқ Ҳасан образини экранларда “Қизил шарбат” сериалида Фируз ролини ўйнаган Ботухон Бўзқурт Юзюлеч гавдалантириши аниқ бўлди.
Ўтган ҳафта турк шоу-бизнеси олами бирйўла иккита бўйдоғи билан хайрлашди. Аввалига Чешме шаҳрида Серкай Тутунжу дабдабали тўй ўтказди. Икки йил аввал танишган Зейнеп Бастик унинг рафиқасига айланди. Турк актёри севгилисига Парижда турмуш қуриш таклифини билдирган эди.
Тўртинчи сентябр куни эса Бурак Ёрук ва Туана Йилмаз тўй суратларини эълон қилди. Тантана Италиянинг Рим яқинидаги Тиволи шаҳрида бўлиб ўтди. Маросим тарихий Сан-Бернардино саройида ўтказилди.
Туркиялик актёрлар Мустафо Серҳат Қиличнинг бевақт вафоти муносабати билан унинг оиласига ҳамдардлик билдиришда давом этмоқда. Ҳозирда ушбу ҳолат юзасидан “шубҳали ўлим” моддаси бўйича жиноий иш қўзғатилган. Марҳум актёрнинг севгилисининг айтишича, Қилич сўнгги кунларда бўйин умуртқасидаги чурра туфайли кучли оғриқлардан шикоят қилган ва охирги бир неча кун давомида алоқага чиқмаган. Мустафо Серҳатнинг жасадини айнан Ўзлем Эсмергул топган. Турк сериаллари юлдузининг кўплаб ҳамкасблари, дўстлари ва танишлари унинг хотирасини ёд этиб, актёрнинг ўлими ўрни тўлмас йўқотиш эканини таъкидлади.
“Олис шаҳар” сериалининг учинчи мавсуми премьераси 14-сентябрда бўлиб ўтади. Бироқ томошабинлар иккинчи мавсумнинг сўнгги қисмини 7-сентябрда кўришлари мумкин. Айрим турк сериаллари мухлисларининг фикрича, “Олис шаҳар” ижодкорлари финал қисмини атайлаб такроран намойиш этишмоқда, негаки айнан шу куни “Никоҳ” номли янги сериал премьераси бўлиб ўтади. Рейтинглар учун шиддатли кураш бошланмоқда.