Берлин Москвага қарши янги чораларни эълон қилди
Германия ташқи ишлар вазири Ёҳанн Вадефул Россиянинг Бонндаги бош консулхонаси ва Берлиндаги «Рус уйи» фаолиятига қарши кўрилган чоралар Москва имкониятларини сезиларли даражада чеклашини айтди. Берлин бу қарорларни Лейпсиг/Ҳалле аеропортидаги терактга уринишга Россиянинг алоқадорлиги ҳақидаги айбловлар билан изоҳламоқда.
Берлин Москвага қарши янги чоралар эълон қилди. Германия ташқи ишлар вазири Ёҳанн Вадефул Россиянинг Бонндаги бош консулхонасини ёпиш ва Берлиндаги "Рус уйи" фаолияти тўғрисидаги келишувни бекор қилиш қарорини изоҳлади.
Унинг сўзларига кўра, бу чоралар Россиянинг Германия ҳудудидаги имкониятларини сезиларли даражада камайтиради. Вадефул 1-сентабр куни АРД ва ЗДФ телеканалларига берган шарҳида Берлиннинг бу ҳаракатлари Лейпсиг/Ҳалле аеропортида содир этилган терактга уринишга Россиянинг алоқадорлиги ҳақидаги хулосаларга жавоб эканини билдирди.
"Биз Россияда бундай ҳаракатларни Германиянинг жавобисиз амалга ошириш мумкин, деган тасаввур пайдо бўлишига йўл қўймаслигимиз керак", - деди Германия ташқи ишлар вазири. Унинг таъкидлашича, Россия томонидан вазиятни янада кескинлаштириш эҳтимолини бутунлай истисно қилиб бўлмайди. Бироқ Германия жавоб чораларини кўрмаганида, Москва буни Германияга қарши кейинги ҳаракатлар учун имконият сифатида қабул қилиши хавфи янада юқори бўлар эди.
**Бонндаги консулхона шубҳа уйғотган**
Вадефул Россиянинг Бонндаги бош консулхонаси ёпилишини "Россиянинг Германиядаги имкониятларини жиддий чекловчи" чора деб атади. Вазирнинг айтишича, мазкур дипломатик ваколатхонадан нафақат Россия Ташқи ишлар вазирлиги, балки мамлакатнинг бошқа идоралари ҳам кенг фойдаланган. Шу сабабли Германия томонида консулхонадан мамлакат хавфсизлигига зарар етказиши мумкин бўлган фаолият амалга оширилмаётганига ишонч бўлмаган.
Берлиндаги "Рус уйи" масаласига тўхталган Вадефул ушбу муассаса энди ўзининг дастлабки вазифасини бажармаётганини билдирди. Унинг сўзларига кўра, марказ аввал Россия ва Германия ўртасидаги маданий алоқаларни ривожлантиришга хизмат қилиши керак эди, аммо ҳозирда бу функсияни бажармаяпти. Шу муносабат билан Германия унинг фаолиятини тартибга солувчи келишувни бекор қилишга қарор қилган.
**Берлин "соя флоти"га босимни ҳам кучайтирмоқчи**
Германия ташқи ишлар вазири Россиянинг "соя флоти"га қарши эҳтимолий янги чоралар ҳақида ҳам фикр билдирди. Унинг айтишича, ҳозирча бу борада аниқ қарор қабул қилинмаган, бироқ Берлин босимни кучайтириш ва қўшимча чоралар кўриш ниятида. Вадефул Германия Россия нефтини санксияларни четлаб ўтиб ташишда фойдаланилаётган кемалар жойлашган ёки улар нефт етказиб бораётган қатор давлатлар билан музокаралар олиб бораётганини маълум қилди.