«Барселона» Габриел Жезус трансферини эълон қилди
«Барселона» футбол клуби бразилиялик ҳужумчи Габриел Жезус билан шартнома имзолаганини маълум қилди. Футболчи Каталония клуби сафига Англиянинг «Арсенал» жамоасидан қўшилди. Келишув ёзги трансфер ойнасининг сўнгги кунида расмийлаштирилди.
«Барселона» Габриел Жезуснинг трансферини расман эълон қилди.
**Трансфер шартлари**
29 ёшли ҳужумчи Каталония клуби билан 2029-йил 30-июнига қадар амал қиладиган шартнома имзолади. Трансфер суммаси ошкор этилмаган бўлса-да, ОАВ маълумотларига кўра, «Барселона» «Арсенал»га тахминан 10 миллион евро тўлайди. Шунингдек, 4 миллион еврогача бонуслар кўзда тутилган ва Лондон клуби футболчининг келажакдаги сотувидан тушган маблағнинг 20 фоизини олиш ҳуқуқига эга бўлади.
**Нима учун айнан Жезус?**
Роберт Левандовски кетганидан сўнг, «Барселона» классик марказий ҳужумчи излаётган эди. Дастлаб «Атлетико Мадрид» футболчиси Хулиан Алварес асосий номзод бўлган, бироқ Мадрид клуби аргентиналик футболчини сотиш бўйича музокаралардан бош тортган. Натижада, «Барселона» эътиборини Жезусга қаратди, у «Арсенал»да Кай Ҳаверс ва Виктор Дёкерешга рақобатни бой бериб, асосий таркибдаги ўрнини йўқотган эди.
**Мураббийнинг фикрлари**
«Барселона» бош мураббийи Ҳанси Флик «Раё Вальекано» устидан қозонилган ғалабадан сўнг ушбу трансферга изоҳ берди:
«Ростини айцам, уни қўлга киритиш имконияти пайдо бўлганидан бироз ҳайрон бўлдим. Унинг ўйин услуби менга жуда ёқади – бу бизнинг услубимизга мос тушади. Ўйлайманки, у ўйинларда бизга катта ёрдам бера олади. У биз учун муҳим ўйинчига айланиши мумкин, шунинг учун [спорт директори] Декога раҳмат – у яна бир бор ажойиб ишга қўл урди».
**Футболчининг фаолияти**
Габриел Жезус 1997-йил 3-апрелда Бразилиянинг Сан-Паулу шаҳрида туғилган. Фаолиятини «Палмейрас» клубида бошлаб, мамлакат кубоги ва чемпионлигини қўлга киритган. 2016-йилда Хосеп Гвардиола бощилигидаги «Манчестер Сити»га ўтган. «Сити» сафида 236 та ўйин ўтказиб, 95 та гол урган ва 45 та голли узатмани амалга оширган. Шунингдек, тўрт марта Англия чемпионлиги, Англия Кубоги ва бошқа совринларни қўлга киритган.
2022-йил июл ойида ҳужумчи «Арсенал»га ўтди ва бу жамоада 123 та учрашувда майдонга тушиб, 32 та гол урди. 2025-йил январ ойида у тиззасининг хочсимон боғламидан оғир жароҳат олди ва фақат декабрга келиб майдонга қайтди ҳамда «тўпчилар»га 2025/26-йилги мавсум чемпионлигини қўлга киритишда ёрдам беришга улгурди.
Жезус «Барселона» ҳужум чизиғини ёзнинг бошқа янги футболчилари – Энтони Гордон ва Карим Адееми билан биргаликда тўлдиради.