Баҳсли роҳибга берилган президент афви бекор қилинди
Галагодаатте Гнанасара 2018 йилда судга ҳурматсизлик қилгани ва бедарак йўқолган карикатурачининг рафиқасини қўрқитгани учун олти йилга озодликдан маҳрум этилган эди.
**Мунозарали роҳибга берилган президентлик авфи бекор қилинди**
Галагодаатте Гнанасара собиқ президент Готабая Ражапаксанинг ишончли иттифоқчиси эди
Шри-Ланка Олий суди қатъий позициядаги буддавий роҳибга берилган президентлик авфини бекор қилди ва бедарак йўқолган сиёсий карикатурачининг рафиқасини қўрқитгани учун унга олти йиллик қамоқ жазосининг қолган қисмини ўташ ҳақида ҳукм чиқарди.
Галагодаатте Гнанасара 2018 йилда судга ҳурматсизлик қилиш ва 2010 йилда ғойиб бўлган Прагит Экналигоданинг рафиқаси Санья Экналигодани қўрқитишда айбдор деб топилган эди.
Роҳиб карикатурачини ўғирлаб кетишда айбланаётган ҳарбий разведка ходимларини қўллаб-қувватлаш учун суд мажлисини бузган эди.
Гнанасара жазонинг бир йилдан камроқ қисмини ўтади, чунки унга ўша пайтдаги президент Майтрипала Сирисена томонидан авф берилган эди.
Прагит Экналигода ўз карикатураларида матбуот эркинлиги, сиёсий ҳокимият ва ижтимоий тенгсизлик масалаларини ёритган.
Унинг ижоди собиқ президент Махинда Ражапаксага нисбатан танқидий руҳда эди. Миллатчи бўлган Ражапакса 2009 йилда қонли фуқаролар урушидан кейин тамил айирмачи исёнчиларини мағлуб этгани билан танилган.
Экналигода 2010 йилда ғойиб бўлган ва ўшандан бери уни ҳеч ким кўрмаган. Рафиқаси унга нима бўлганини аниқлаш учун курашиб келмоқда ва расмийлар унинг ғойиб бўлишини текшириш учун етарлича ҳаракат қилмаганини айтади.
«Боду Бала Сена» (ББС) ёки «Буддавийлик кучи» ташкилотига раҳбарлик қилувчи Гнанасара Ражапакса ва унинг кейинчалик президент бўлган акаси Готабаяни қўллаб-қувватлаган.
2025 йилда у Ислом динини ҳақорат қилгани ва диний адоват қўзғатгани учун алоҳида тўққиз ойлик қамоқ жазосига ҳукм қилинган эди.
Шри-Ланкада буддавий роҳиблар камдан-кам ҳолларда судланади ва улардан бирининг қамоқ жазосига маҳкум этилиши деярли кузатилмаган ҳодисадир.