АҚШдан яширинча 25 мингдан ортиқ мигрант депортация қилинди
АҚШдан яширинча 25 мингдан ортиқ мигрант чиқариб юборилди
2025 йил январдан бошлаб Дональд Трамп маъмурияти АҚШдан 25 мингдан ортиқ мигрантни ўзлари билан ҳеч қандай алоқаси бўлмаган мамлакатларга яширинча депортация қилди. Бу ҳақда Forbidden Stories журналистлар консорциумининг суриштирувида айтилади.
Refugees International ва Human Rights First ташкилотлари маълумотларига кўра, 20 мингга яқин киши автобусларда Мексикага олиб чиқилган. Яна 5 мингдан ортиқ киши самолётларда Африка, Лотин Америкаси, Кариб ҳавзаси ва Марказий Осиё давлатларига юборилган. Кўпинча ушбу учинчи мамлакатлардан депортация қилинган одамлар кейинчалик ўз ватанларига қайтарилган, у ерда эса уларнинг ҳаёти ёки эркинлигига хавф таҳдид солиши мумкин эди.
Суриштирув муаллифларининг таъкидлашича, АҚШ депортация қилинган мигрантларни қабул қилиш бўйича камида 35 та давлат билан норасмий келишувлар тузган, бироқ улар орасида на Россия, на Украина бор. Ҳозирги вақтда 28 та давлат ушбу келишувлар доирасида одамларни қабул қилиб бўлган, яна 7 таси эса буни кейинроқ амалга ошириш мажбуриятини олган.
Forbidden Stories маълумотларига кўра, Ўзбекистон фуқаролари АҚШдан 4 та давлатга: Коста-Рика, Панама, Марказий Африка Республикаси ва Молдовага депортация қилинган. 2025 йилда Америка Қўшма Штатларидан бортида Ўзбекистон фуқаролари бўлган бир нечта махсус рейслар учиб кетган. Август ойида Тошкент халқаро аэропортига махсус чартер рейси билан 18 нафар Ўзбекистон фуқароси олиб келинган. Бундан олдин, 11 июнь куни эрталаб АҚШдан 24 нафар Ўзбекистон фуқароси бўлган навбатдаги чартер рейси етиб келган эди. Ундан ҳам аввалроқ АҚШдан чартер рейси билан 26 нафар Ўзбекистон фуқароси қайтган эди.