АҚШ 175 минг нафар хорижликнинг визасини бекор қилди
АҚШ президенти Доналд Трамп маъмурияти даврида 175 мингдан зиёд хорижликнинг визаси бекор қилинди. Бу ҳақда Реутерс агентлиги Давлат департаментига таяниб хабар берди.
Ушбу чора "виза шартларини бузган, жиноят содир этган, АҚШ фуқароларига нисбатан зўравонликка ундаган, америкаликларни фирибгарлик йўли билан алдаган, иммиграция тизимини суиистеъмол қилган ёки миллий хавфсизликка таҳдид солган" хорижликларга нисбатан қўлланилган.
Визаларнинг аксарияти ҳуқуқ-тартибот идоралари билан боғлиқ ҳолатлардан сўнг бекор қилинган. Бунга фуқароларга ҳужум қилиш, маст ҳолда машина бошқариш, ўғрилик ва гиёҳванд моддалар билан боғлиқ жиноятлар асосий сабаб бўлган.
Визаси бекор қилинганлар орасида зўрлаш, жинсий тажовуз, одам ўғирлаш, одам савдоси ва болаларга нисбатан жинсий зўравонлик тасвирланган ўндан ортиқ материални сақлашда айбланган шахслар ҳам бор. Шунингдек, АҚШга "туғуруқ туризми" мақсади билан келгани айтилган 100 дан ортиқ ота-онанинг ҳам визаси бекор қилинган.
Ҳатто консерватив фаол Чарли Киркнинг отиб ўлдирилишини "нишонлаган", жумладан, "у жуда кеч ўлди" деб ёзган бир нечта чет элликнинг визаси бекор қилинган. Аввалроқ Давлат департаменти январ ойида 100 мингдан ортиқ виза бекор қилингани билдирганди, бу ўшанда рекорд кўрсаткич бўлган.
Визаларнинг бекор қилиниши Трамп 2025-йили Оқ уйга қайтганидан сўнг бошланган кенг кўламли иммиграция чекловларининг бир қисмидир. Ўшанда ҳатто амалдаги визаси бор муҳожирлар ҳам депортация қилинганди. Маъмурият, шунингдек, виза бериш тартибини қатъийлаштириб, аризачиларнинг ижтимоий тармоқдаги саҳифалари ҳамда даромадларини текширишни кучайтирган.
Яқинда Трамп туғилиш бўйича фуқаролик бериш тартибини чеклади ва "туғуруқ туризми"ни тақиқлади. Шунингдек, 50 та давлат фуқароларига туристик ва бизнес визалари беришда 20 минг долларгача гаров талаб этиш тартибини жорий этди. Уларнинг 30 таси Африка давлатлари бўлиб, Марказий Осиёдан Қирғизистон, Тожикистон ва Туркманистон рўйхатга киритилган. Ўзбекистон мазкур рўйхатда йўқ. Давлат департаменти рўйхатни кейинчалик кенгайтириш ҳуқуқини сақлаб қолган.