АҚШ 25 минг муҳожирни яширинча учинчи мамлакатларга депортация қилган — ОАВ

АҚШ 25 минг муҳожирни яширинча учинчи давлатларга депортация қилган — ОАВ

АҚШ президенти Доналд Трамп лавозимга киришганидан буён Вашингтон мамлакатдаги 25 мингдан ортиқ муҳожирни махфий келишувлар асосида учинчи давлатларга депортация қилган. Бу ҳақда Халқаро суриштирувчи журналистлар консорсиуми ўтказган 24 та суриштирув натижаларига таянган Деуцче Велле хабар берди.

Форбидден Сториес журналистлар тармоғи 21-сентябр куни маълум қилишича, АҚШ маъмурияти бу мақсадлар учун 410 миллион доллар ажратган. Депортация қилинганларнинг аксарияти — тахминан 20 минг киши автобусларда Мексикага юборилган. Қолганлари эса Лотин Америкаси, Кариб ҳавзаси, Африка, Марказий Осиё ва Тинч океани минтақасидаги 27 та давлатга самолётларда етказилган.

**Келишувлар 38 та мамлакат билан тузилган**

Суриштирувга кўра, депортация қилинганлар орасида таъқибга учраш хавфи ёки бошқа жиддий таҳдидлар сабабли АҚШ судлари томонидан ўз ватанига чиқариб юборилиши тақиқланган шахслар ҳам бўлган. Уларнинг айримлари кейинчалик АҚШ тўғридан-тўғри юбора олмаган бошқа мамлакатларга жўнатилган.

Ҳужжатда Эрон, Афғонистон, Ироқ, Қирғизистон, Сьерра-Леоне ва Гана фуқароларининг Африка мамлакатларига депортация қилингани ҳақидаги ҳолатлар келтирилган. Бундай депортацияларнинг ҳақиқий сони бундан ҳам кўпроқ бўлиши мумкин.

Суриштирув муаллифларининг ёзишича, битимлар камида 38 та мамлакат билан тузилган бўлиб, уларнинг деярли учдан бир қисми Африка давлатларидир. Нашр маълумотига кўра, учинчи давлатлар билан музокаралар олиб бориш ва тегишли тўловларни амалга ошириш учун АҚШ Давлат департаментининг Иммиграция бюроси масъул ҳисобланади. 2025-йил май ойида ташкил этилган бу идорага 41 ёшли дипломат Кристиан Эрхардт раҳбарлик қилади.

АФП ахборот агентлигининг қайд этишича, Вашингтон Африка мамлакатларини депортация қилинганларни қабул қилишга рози қилиш учун, бошқа чоралар қаторида, виза чекловларидан ҳам босим воситаси сифатида фойдаланмоқда.

Журналистлар ушбу дастурга БМТ агентлиги ҳисобланган Халқаро миграция ташкилоти (ХМТ) ҳам жалб этилганини аниқлади. Ташкилотнинг 13 та мамлакатдаги ходимлари депортация қилинганларни уй-жой, озиқ-овқат ва психологик ёрдам билан таъминламоқда.

Суриштирув муаллифлари қўлга киритган ХМТнинг ички ҳужжатларида ташкилот АҚШнинг муҳожирларни учинчи давлатларга депортация қилиш сиёсатига шерик сифатида кўрилиши хавфи борлиги таъкидланади. ХМТ эса ўз ёрдами фақат депортация қилинганларнинг аҳволини яхшилайдиган дастурлардагина иштирок этаётганини билдирмоқда.