АҚШда қулоғи оғир инсонларга мўлжалланган кўзойнаклар сотувга чиқди
Кўзойнакка ўрнатилган микрофонлар атрофдаги товушларни қабул қилади, процессор келаётган овоз сигналларини таҳлил қилади, инсон нутқини ажратади. Қайта ишланган товуш қулоқлар яқинида жойлашган кичик динамиклар орқали узатилади. Бунда қулоқ ичига бирор қурилма жойлаштириш талаб этилмайди
АҚШда қулоғи оғир инсонлар учун мўлжалланган кўзойнаклар савдога чиқарилди
Американинг Легато компанияси бир вақтнинг ўзида кўришни тўғрилаш ва эшитиш қурилмаси вазифасини бажаришга мўлжалланган Фрамес кўзойнакларини сотувга чиқарди. Кўзойнак гардишларига микрофонлар, процессор ва динамиклар жойлаштирилган. Товушни қайта ишлаш тизими эса атрофдаги шовқинлар орасидан инсон нутқини ажратиб беради.
Бу кўзойнаклар эшитиш қобилияти енгил ва ўртача даражада пасайган инсонлар учун ишлаб чиқилган. Микрофонлар атрофдаги товушларни узлуксиз қабул қилиб туради. Уларга ўрнатилган процессор келаётган овоз сигналларини таҳлил қилади, инсон нутқини ажратади ва турли частоталарнинг кучайиш даражасини бошқаради.
Қайта ишланган товуш қулоқлар яқинида жойлашган кичик динамиклар орқали узатилади. Бунда қулоқ ичига ҳеч қандай қурилма жойлаштириш талаб этилмайди. Қулоқлар очиқ қолади, шу сабабли инсон атрофдаги товушларни табиий равишда эшитишда давом этади.
Ишлаб чиқарувчи овозни йўналтирилган ҳолда узатиш технологиясини ҳам қўллаган. Бу яқин атрофдаги одамлар кўзойнакдан чиқаётган овозни эшитишини камайтиришга ёрдам беради. Овозни қайта ишлаш жараёни бевосита кўзойнакнинг ўзида амалга оширилади. Қурилмада камера йўқ ва суҳбатлар ёзиб олинмайди.
Фойдаланувчи смартфон учун ишлаб чиқилган махсус илова орқали товуш баландлигини бошқариши, турли шароитларга мослаб овозни қайта ишлаш параметрларини танлаши мумкин.
Кўзойнак гардишига оддий ёки рецепт асосида тайёрланган линзаларни ўрнатиш мумкин. Гардиш турига қараб, линзаларсиз кўзойнакнинг оғирлиги 27 граммдан, линзалар ўрнатилгандан кейин эса тахминан 34 граммдан бошланади.
Кўзойнакка ўрнатилган аккумулятор 10 соатдан ортиқ ишлайди. Тўлиқ қувватланиш учун икки соатга яқин вақт керак бўлади. Ярим соатлик қувватлаш эса қўшимча икки соат фойдаланиш имконини беради.
Қурилма Блуетоотҳ 5.3 технологиясини ҳам қўллаб-қувватлайди. Уни смартфонга улаб, телефон орқали суҳбатлашиш ва мусиқа тинглаш мумкин.
Легато уч хил гардишли — Ариа, Ҳармонй ва Сймпҳонй кўзойнакларини сотувга чиқарди. Ҳармонй ва Сймпҳонй нархи 999 доллардан, Ариа нархи эса 1099 доллардан бошланади.