АҚШда гипертовушли ракеталарни ҳам уришга мўлжалланган янги ракеталар тақдим этилди
АҚШнинг Андурил компанияси ҳаво ва ракета ҳужумидан мудофаа вазифалари учун Стеелфин тутувчи ракеталар оиласини тақдим этди. Компания уларни турли таҳдидларга қарши мослаштириш ва нисбатан кам харажат билан катта ҳажмда ишлаб чиқаришни мақсад қилган. Ракеталарнинг нархи ва батафсил техник кўрсаткичлари ҳозирча очиқланмаган.
АҚШда гипертовушли ракеталарни ҳам уриб туширишга мўлжалланган янги ракеталар намойиш этилди. Бу ёндашув ҳар бир вазифа учун мутлақо янги ракета яратиш ўрнига, мавжуд конструксияни мослаштириш имконини бериши кутилмоқда.
Тақдимот АҚШ қуролли кучлари арзон дронлардан тортиб қанотли, баллистик ва гипертовушли ракеталаргача бўлган ҳаво таҳдидларига қарши мудофаа воситалари захирасини оширишга интилаётган бир пайтда бўлиб ўтди.
Стеелфин оиласи ягона икки босқичли схемага таянган. Биринчи босқич ракетани тезлаштирувчи блокдан, иккинчиси эса нишонни бевосита йўқ қилишга мўлжалланган тутувчи қисмдан иборат.
Турли вариантларда корпуснинг асосий конструксиялари, борт электроникаси, дастурий таъминот, парвозни бошқариш тизими ва уланиш интерфейсларидан умумий фойдаланиш режалаштирилган. Тезлаштирувчи блоклар ва иккинчи босқич қисмларини алмаштириш орқали ракета муайян вазифага мослаштирилади.
Андурил маълумотига кўра, оила таркибида нишонни бевосита урилиш орқали йўқ қиладиган тутувчилар ҳам, парчаланувчи-фугас жанговар қисмга эга вариантлар ҳам бўлади.
Компания Стеелфин орқали алоҳида обьектларни ҳимоя қилишдан тортиб, пастки эшелондаги ҳаво ва ракета мудофааси ҳамда юқори эшелонда баллистик ракеталарни тутиб қолишгача бўлган вазифаларни қамраб олишни мақсад қилмоқда. Мўлжалланган нишонлар орасида қанотли ва гипертовушли ракеталар ҳам бор.
Бироқ қайси модификация айнан қайси таҳдидга қарши қўлланиши ҳозирча аниқлаштирилмаган. Тутиб қолиш масофаси, қўллаш баландлиги ва эълон қилинган имкониятларни баҳолашга ёрдам берадиган бошқа кўрсаткичлар ҳам келтирилмаган.
Андурил Стеелфин устида бир неча йилдан бери, бир нечта буюртмачининг молиявий иштироки билан ишлаётганини билдирган. Компания дастурга хос макетлар ва тақлидий аппаратлар ёрдамида баллистик синовлар ўтказган.
Стеелфинънинг турли вариантлари бўйича парвоз синовлари 2027-йилга режалаштирилган.