АҚШ ВТБни Эрон билан боғлиқ санксиялар рўйхатига қўшди
АҚШ Молия вазирлигининг Хорижий активларни назорат қилиш бошқармаси (ОФАС) Россиянинг активлари бўйича иккинчи йирик банки - ВТБни Эрон билан боғлиқ санксиялар рўйхатига қўшди. Вашингтон банкни Эронга нисбатан амалдаги чекловларни четлаб ўтишга кўмаклашганликда айбламоқда.
АҚШ ВТБни Эрон билан боғлиқ санксиялар рўйхатига қўшди
АҚШ Молия вазирлиги 14-сентабр куни эълон қилган маълумотга кўра, Россиянинг ВТБ банки Эрон билан боғлиқ санксиялар доирасидаги рўйхатга киритилган.
Америка томони санксияларни ВТБнинг Эронга нисбатан жорий этилган чекловларни четлаб ўтишга қаратилган молиявий операцияларда қатнашгани билан изоҳлади.
АҚШ Молия вазирлиги маълумотларига кўра, ВТБ Эронда ўз ваколатхоналарини очган, санксия остидаги Эрон банклари билан ҳисоб-китобларни амалга оширган ҳамда музлатилган Эрон активларининг миллиардлаб доллар миқдоридаги қисмини кўчириш билан боғлиқ операцияларда иштирок этган.
Шунингдек, банк Россия ва Эрон ўртасидаги савдони кенгайтириш мақсадида миллий валюталарда ҳисоб-китоб қилиш тизимини йўлга қўйгани айтилмоқда. Ушбу механизм Эрон риали ва Россия рублида очилган корреспондентлик ҳисобварақлари орқали операцияларни амалга ошириш имконини берган.
ВТБ аввал ҳам АҚШ санксияларига дуч келган. 2014-йил июлида Қримнинг Россия томонидан қўшиб олиниши ортидан банкка нисбатан секторал санксиялар жорий этилган эди.
2022-йил февралида Россия Украинага қарши кенг кўламли уруш бошлаганидан кейин Вашингтон ВТБга нисбатан блокловчи санксиялар киритган.
Энди эса банк Эрон билан молиявий ҳамкорлик ва Теҳронга нисбатан жорий этилган санксияларни четлаб ўтишга кўмаклашиш билан боғлиқ асослар бўйича ҳам АҚШ санксиялар рўйхатига киритилди.