АҚШда Россияга қарши янги санксиялар ноябргача кечикиши мумкин
АҚШ Вакиллар палатасида Россияга қарши янги санксиялар тўғрисидаги қонун лойиҳасини муҳокама қилиш камида ноябрдаги Конгресс сайловларигача чўзилиши мумкин. Конгресс аъзолари Россия нефти ва газининг йирик харидорларига 100 фоизгача бож жорий этиш АҚШда ёнилғи нархларининг ошиши ва истеъмолчиларга салбий таъсир кўрсатишидан хавотирда.
АҚШда Россияга қарши янги санксиялар ноябргача кечикиши мумкин
АҚШ Конгресси Вакиллар палатасида Россияга қарши қатъий санксияларни назарда тутувчи қонун лойиҳасини кўриб чиқиш кечикиши эҳтимоли бор. Бу ҳақда Блоомберг агентлиги 3-сентабр куни хабар берди.
Вакиллар палатаси спикери Майк Жонсоннинг сўзларига кўра, ҳужжат нафақат демократларда, балки айрим республикачиларда ҳам саволлар уйғотмоқда.
«Биз барчамиз Россияга қарши санксияларни қўллаб-қувватлаймиз, аммо формула тўғри бўлиши керак», деган Жонсон.
Қонун лойиҳаси аввал АҚШ Сенатида тезкор тарзда маъқулланган эди. Аммо Вакиллар палатасида унинг айрим бандлари, хусусан, президент Доналд Трампнинг тарифлар жорий этиш бўйича ваколатларини кенгайтириш таклифи баҳс-мунозараларга сабаб бўлмоқда.
Лойиҳа президентга Россия нефти ва газини энг кўп харид қилувчи бешта давлатга нисбатан 100 фоизлик бож белгилаш имконини беришни кўзда тутади.
Шунингдек, Россияга санксияларни четлаб ўтишда ёрдам бераётган деб топилган яна бешта давлатга нисбатан ҳам шундай чоралар қўлланиши мумкин.
Потенсиал нишонлар орасида биринчи навбатда Хитой, Ҳиндистон ва Туркия тилга олинмоқда.
Вакиллар палатасининг Ташқи ишлар қўмитаси раиси, республикачи Браян Маст ҳозир янги чоралар ёнилғи бозорига қандай таъсир кўрсатиши мумкинлиги ўрганилаётганини маълум қилди.
Унинг фикрича, Ҳиндистон ва Россия энергия ресурсларининг бошқа йирик харидорлари Россия хомашёсидан воз кечиб, муқобил етказиб берувчиларга ўца, жаҳон бозорида талаб қайта тақсимланиши мумкин. Бу эса АҚШда бензин нархининг ошиши хавфини юзага келтиради.
Бу масала ноябрдаги Конгресс сайловлари арафасида айниқса муҳим ҳисобланмоқда.
Демократлар қонун лойиҳасининг бошқа жиҳатини танқид қилмоқда. Улар ҳужжат Трамп маъмуриятига тарифлардан жуда кенг кўламда фойдаланиш учун қўшимча ҳуқуқий асос яратиб беришидан хавотирда.
Вакиллар палатаси Ташқи ишлар қўмитаси аъзоси Грегори Микснинг фикрича, президентга ҳозирда мавжуд бўлмаган қўшимча ваколатлар берилиши мумкин.