АҚШ ва Марказий Осиё мамлакатлари савдо, энергетика ва маданият соҳаларида ҳамкорликни ривожлантиришга келишиб олдилар
АҚШ ва Марказий Осиё мамлакатлари C5+1 формати доирасида савдо, маданият ва хавфсизлик соҳаларида ҳамкорликни ривожлантиришга, шунингдек, энергетика шериклигини, жумладан, фойдали қазилмаларни қазиб олиш ва қайта ишлаш соҳасида мустаҳкамлашга интилмоқда.
АҚШ ва Марказий Осиё мамлакатлари савдо, энергетика ва маданият соҳаларидаги ҳамкорликни кенгайтиришга келишиб олдилар
Узбекистон, Қозоғистон, Қирғизистон, Тожикистон ва Туркманистон ташқи ишлар вазирлари АҚШ давлат котиби билан биргаликда 19 октябрь куни Самарқандда бўлиб ўтган C5+1 форматидаги вазирлар учрашуви якунлари бўйича қўшма баёнот имзоладилар. Ҳужжатда Марказий Осиё давлатлари ва АҚШ ўртасидаги ҳамкорликнинг асосий йўналишлари белгилаб берилган.
«Бу йил Қозоғистон, Қирғизистон, Тожикистон, Туркманистон ва Ўзбекистон ўз мустақиллигининг 35 йиллигини нишонламоқда, АҚШ эса диққатга сазовор сана — мустақилликни қўлга киритганининг 250 йиллигини нишонламоқда. Биз кўплаб авлодлар давомида мустаҳкам шериклигимизни давом эттиришга умид қиламиз», — дейилади баёнотда.
Томонлар икки томонлама савдо ва инвестицияларга туртки бериш, шунингдек, жадал ўсаётган бозорларда янги имкониятларни очиш учун Каспий орти транспорт йўналишини янада ривожлантириш муҳимлигини таъкидладилар.
«Марказий Осиёда минтақалараро савдони кенгайтириш, транспорт боғлиқлигини яхшилаш, божхона тартиб-оидаларини уйғунлаштириш ва саноат ҳамкорлигини мустаҳкамлаш орқали янада чуқурроқ минтақавий иқтисодий интеграцияга кўмаклашиб, биз Америка Қўшма Штатлари иқтисодиёти билан интеграциялашган рақобатбардош минтақавий бозорни яратмоқдамиз», — дейилади баёнотда. «Биз Марказий Осиё яна глобал иқтисодиёт марказига қайтишига интиламиз».
B5+1 платформаси бундан буён ҳам Марказий Осиёда Америка компаниялари учун имкониятлар яратади. «Шу билан бирга, ҳукуматларимиз Марказий Осиё мамлакатлари корхоналари учун АҚШ бозорига инвестиция киритиш имкониятларини кенгайтиришга интилмоқда. Хавфсиз ва ишончли технологияларга, АҚШнинг технологик соҳадаги илғор тажрибасига, шунингдек, Марказий Осиё мамлакатларининг ўсиб бораётган технологик секторларига таянган ҳолда, биз электрон тижорат ривожланадиган, инновацион ечимлар фаол жорий этиладиган ва иқтидорли тадбиркорлар муваффақиятли ривожланиши учун барча шароитларга эга бўлган минтақани шакллантиришга интиламиз», — дейилади баёнотда.
Томонлар АҚШ ва Марказий Осиё мамлакатлари ўртасидаги энергетиклараро шерикликни мустаҳкамлаш юқори қўшилган қийматга эга бўлган интеграциялашган етказиб бериш занжирларини барпо этишга ёрдам беришини ва барқарор иқтисодий ўсиш ҳамда энергетик барқарорликни таъминлашини қайд этдилар.
«Мамлакатларимизнинг ҳар бири ўзлаштирилмаган табиий ресурсларнинг ноёб захираларига эга. Минтақада энергетика секторини ривожлантиришнинг қудратли жамоавий драйверига айланиш учун биз ўз кучли томонларимизни бирлаштирамиз… Биз фойдали қазилмаларни қазиб олиш ва қайта ишлаш учун кенг истиқболларни кўрмоқдамиз, бу мамлакатларимизнинг ҳар бири учун максимал манфаат келтиради. Шунингдек, Марказий Осиё мамлакатлари минтақа ичида юқори қўшилган қийматга эга бўлган маҳсулотлар улушини оширишнинг инновацион ёндашувларини ишлаб чиқиш ва ушбу маҳсулотларни халқаро бозорларга олиб чиқиш механизмларини яратиш ҳисобига ўз экспорт салоҳиятини амалга оширишларига умид қиламиз», — дейилади баёнотда.
Марказий Осиё мамлакатлари ва АҚШ, шунингдек, C5+1 формати доирасида хавфсизлик соҳасидаги ҳамкорликни кучайтириш ниятида. Терроризм ва трансмиллий уюшган жиноятчиликка қарши курашишга, шунингдек, чегара хавфсизлигини мустаҳкамлашга алоҳида эътибор қаратилади.
«Бизнинг биргаликдаги саъй-ҳаракатларимиз, жумладан, ноқонуний иммиграция, одам савдоси, шунингдек, гиёҳвандлик воситалари ва қурол-яроғнинг ноқонуний айланишига қарши курашиш ҳисобига хавфсизлик даражасини оширишга хизмат қилади… Рақамли давр таҳдидларини камайтиришга қаратилган замонавий ёндашув — жумладан, C5+1 форматида киберхавфсизлик соҳасидаги ҳамкорликни чуқурлаштириш ҳисобига — кибержиноятларга муваффақиятли қарши туриш қобилиятимизни мустаҳкамлайди», — дейилади баёнотда.
Томонлар АҚШ ва Марказий Осиё мамлакатлари ўртасида ядровий материалларнинг сақланиши бўйича узоқ муддатли ҳамкорликни қутладилар. «Марказий Осиёда ядро қуролидан холи ҳудуд барпо этиш тажрибасига таянган ҳолда, биз ядро хавфсизлиги, тарқатмаслик кафолатлари, ядровий материалларни жисмоний ҳимоя қилиш ва атом энергиясидан тинч мақсадларда фойдаланиш масалалари бўйича амалий ҳамкорликни чуқурлаштирамиз», — дейилади баёнотда.
Томонлар, шунингдек, С5+1 форматидаги барча иштирокчи мамлакатларнинг маданий меросини сақлаб қолиш ва бу йўналишдаги ҳамкорликни мустаҳкамлашга содиқликларини тасдиқладилар.
«Биз С5+1 мамлакатларининг ноёб тарихини оммалаштириш ва ҳимоя қилиш мақсадида ҳуқуқни муҳофаза қилиш органлари ва маданият муассасалари ўртасидаги ҳамкорликни ривожлантирамиз; профессионал, маданий ва таълим алмашинувларини кенгайтиришга; қадимги ёдгорликларни сақлаш ва ҳимоя қилиш учун янги технологиялардан фойдаланишга; маданий меросни муҳофаза қилиш масалаларини ҳуқуқни муҳофаза қилиш органлари фаолиятига интеграция қилишга; шунингдек, жаҳон майдонида етакчи роль ўйнашга қодир бўлган юқори малакали кадрларни тайёрлашга интиламиз», — дейилади баёнотда.