АҚШ санкцияларидан сўнг Руанда армияси жамоаси Африка лигасидан четлатилди, дейди NBA

Руанда армияси жамоаси АҚШ санкцияларидан сўнг Африка лигасидан четлатилди, дейди NBA

Руанда армиясининг APR жамоаси ўтган йили Баскетбол бўйича Африка лигасида учинчи ўринни эгаллаган эди

Миллий баскетбол ассоциацияси (NBA) Руанда армияси жамоасини март ойида мамлакатга қарши жорий этилган АҚШ санкциялари сабабли Африка лигасидан чиқариб ташлаганини маълум қилди.

NBA аввалроқ Руанда армияси томонидан молиялаштириладиган «Armée Patriotique Rwandaise» (APR) клуби 2026 йилги Баскетбол бўйича Африка лигасида (BAL) иштирок этмаслигини билдирган эди.

Аммо бу NBA’нинг APR нима учун четлатилганига биринчи марта изоҳ беришидир.

Ассоциация АҚШнинг икки сенатори томонидан юборилган ва Руанда жамоаси билан ҳамкорликни қайта кўриб чиқишни сўраб ёзилган шикоят хатига жавоб қайтарди. Март ойида АҚШ Руанда армиясини Конго Демократик Республикасидаги низони авж олдиришда айблаб, унга қарши санкциялар киритган эди.

Сенаторларнинг таъкидлашича, NBA «инсон ҳуқуқларини тизимли равишда бузаётган Руанда ҳукуматидан пул қабул қилиш орқали спорт воситасида ниқобланишга (sportswashing) шерик бўлиб қолиш хавфи остида турибди».

Ўтган ҳафтада АҚШ КДР шарқининг катта қисмини ўз назоратига олган М23 исёнчи гуруҳини қўллаб-қувватлагани учун Руанда Мудофаа вазирлигига қарши ҳам санкциялар жорий этди. Руанда рад этиб бўлмайдиган далилларга қарамай, исёнчиларни қўллаб-қувватлаётганини инкор этмоқда.

Руанда BAL’нинг расмий ҳамкори ҳисобланади ва лига финал ўйинларини пойтахт Кигалидаги 10 000 ўринли «BK Arena»да ўтказиш учун пул тўлайди.

NBA’га юборилган 23 октябрдаги хатда демократ сенатор Жеффри Меркли ва унинг республикачи ҳамкасби Марша Блэкберн ассоциацияга Руанда билан давом этаётган ҳамкорлиги бўйича 2 ноябргача ёзма жавоб бериш муҳлатини қўйган эди.

«Инсон ҳуқуқларини бузаётган хорижий ҳукуматлардан пул қабул қилишда NBA учун сўнгги чеклов қаерда?» — деб сўрашган сенаторлар.

Бошқа саволлар қаторида улар ассоциация «Руанда билан давом этаётган ҳамкорлигини ўзининг адолатга гўёки содиқлиги билан қандай уйғунлаштира олиши мумкинлигини» ҳам сўрашган.

Американинг ESPN спорт веб-сайти хабарига кўра, NBA комиссари ўринбосари Марк Татум ўз жавобида Руанда жамоаси йил бошида жорий этилган санкциялардан сўнг BAL’дан «чиқариб олинганини» айтган.

BAL — NBA ва баскетбол бўйича жаҳон бошқарув органи Fiba томонидан ташкил этилган ва биргаликда ўтказиладиган умумафрика баскетбол лигасидир.

NBA’нинг билдиришича, АҚШ санкциялари амалда бўлиб турган вақтда APR баскетбол клуби мусобақалардан четлатилган ҳолда қолади.

APR Руанданинг етакчи баскетбол жамоаларидан бири бўлиб, мамлакат шарафини 2024 ва 2025 йилги Африка лигасида ҳимоя қилган ва сўнггисида учинчи ўринни эгаллаган. Бу йил унинг ўрнини «RSSB Tigers» эгаллади.

2021 йилдаги биринчи ўйиндан бери Руанда лиганинг биттасидан ташқари барча финал ва плей-офф ўйинларига мезбонлик қилган.

Хабарларга кўра, NBA маркетинг ва ҳамкорлик ҳуқуқлари учун ушбу мамлакатдан ҳар йили миллионлаб доллар олади.

КДР Руанданинг нуфузли халкаро спорт битимларини, жумладан NBA, Европа футбол клублари ва Формула 1 билан тузилган шартномаларини қайта-қайта танқид қилиб келади ва уларни ушбу кампанияларни тўхтатишга чақирди.

Унинг таъкидлашича, бу битимлар КДР шарқида низо давом этаётган бир пайтда Руандага ўзининг глобал обрўсини яхшилашига ёрдам беради.