АҚШ Россияга боғлиқ РИС Нетворк тармоғига қарши айбловлар эълон қилди
АҚШ Адлия вазирлиги Россия махсус хизматларига алоқадор деб кўрсатилаётган РИС Нетворк тармоғи аъзоларини терроризмни молиялаштириш ҳамда АҚШ ва бошқа давлатларда буюртма асосида қотилликлар содир этиш учун тил бириктиришда айблади. Тергов маълумотларига кўра, тармоқ Украинага ёрдам бераётган Европа мамлакатларидаги фуқаролик ва ҳарбий инфратузилма обьектларига ҳужумлар уюштиришга ҳам уринган.
АҚШ Россияга алоқадор РИС Нетворк тармоғига қарши айбловларни эълон қилди
АҚШнинг Ню-Ёрк Жанубий округи прокуратураси бир нечта шахсга терроризмни молиялаштириш ҳамда дунёнинг турли мамлакатларида, жумладан АҚШ ҳудудида буюртма қотилликларни амалга ошириш мақсадида тил бириктириш бўйича айблов қўйди. Бу ҳақда 15-сентабр куни АҚШ Адлия вазирлиги маълум қилди.
Америка томонининг таъкидлашича, айбланувчилар Россия махсус хизматлари манфаатлари йўлида ҳаракат қилган ва РИС Нетворк деб аталувчи халқаро тармоқ билан боғлиқ бўлган.
Айблов хулосасида қайд этилишича, тармоқ аъзолари АҚШ ва бошқа давлатлардаги шахсларга муайян обьектлар ҳамда одамлар ҳақида дастлабки маълумот тўплаш, шунингдек, нишонга олинган шахсларни ўлдириш учун пул тўлаган. Бундан ташқари, уларнинг шерикларига Украинага ёрдам кўрсатаётган ёки Киев тарафдори деб ҳисобланган Европа мамлакатларида фуқаролик ва ҳарбий инфратузилма обьектларига ҳужумлар уюштириш вазифаси берилгани иддао қилинмоқда.
Мазкур иш бўйича терговда АҚШ Федерал тергов бюроси — ФТБ ҳам қатнашган.
АҚШ бош прокурорининг миллий хавфсизлик масалалари бўйича ёрдамчиси Жон Айзенбергнинг айтишича, гумонланувчилар АҚШ фуқаролари ва хорижликларни Россия раҳбарияти топшириғи асосида қотилликлар содир этиш учун ёллашга уринган.
АБС Невс телеканали АҚШ бош прокурори Тодд Бланшга таяниб хабар беришича, эълон қилинган айбловлар орасида Вашингтон шаҳрида бўлиши мумкин деб ҳисобланган россиялик диссидентни ўлдиришга уриниш билан боғлиқ эпизод ҳам бор.
АҚШ Адлия вазирлиги РИС Нетворкъни Россия давлат аппаратининг хорижда ҳужумлар, жумладан қотилликларни ташкил этиш билан шуғулланувчи тармоғи сифатида таърифламоқда. Вазирлик маълумотига кўра, тармоқ аввал Россиядан чиққан диссидентлар ва махсус хизматларни тарк этган шахсларга эътибор қаратган, кейинчалик эса Украина иттифоқчилари ҳисобланган давлатларни ҳам нишонга ола бошлаган.
АҚШ расмийларига кўра, айбланувчилардан уч нафари РИС Нетворк тармоғида юқори лавозимларни эгаллаган.
Улардан бири — «Полковник Юрий» лақаби билан танилган Юрий Храмеев. АҚШ прокуратураси уни Россия махсус хизматларининг собиқ полковниги деб кўрсатмоқда. Айбловга кўра, Храмеев россиялик диссидентларни ўлдириш учун ижрочиларни жалб қилиш жараёнида қатнашган.