АҚШда “туғуруқ туризми” чекловлари фонида мингга яқин сохта никоҳ иши бўйича айблов эълон қилинди
АҚШда асосан хитойликларга яшаш ҳуқуқини олиб бериш учун 1000 га яқин сохта никоҳ тузишда гумонланаётган 11 кишига нисбатан айблов эълон қилинди. Бу ҳолат Трампнинг фақат фарзандига фуқаролик олиш мақсадида келувчиларга, яъни ътуғуруқ туризмиъга қарши курашни кучайтиргани фонида юз бермоқда.
АҚШда "туғуруқ туризми"га қарши чекловлар кучайган бир пайтда, мингга яқин сохта никоҳ иши бўйича айбловлар эълон қилинди.
12-август куни АҚШ Адлия вазирлиги 11 нафар шахсга нисбатан айблов эълон қилди. Реутерс хабарига кўра, улар ўн йил давомида асосан хитойлик фуқароларга АҚШда қонуний яшаш ҳуқуқини олишда ёрдам бериш мақсадида 1000 га яқин сохта никоҳ ташкил этганликда гумонланмоқда.
Манҳеттендаги федерал судда эълон қилинган айблов хулосасида айтилишича, хорижий фуқаролар АҚШ фуқароси билан турмуш қуриш ва қонуний яшаш ҳуқуқини қўлга киритиш учун олти кишидан иборат "воситачилар" гуруҳига ҳар бири 100 000 долларгача пул тўлаган. Айблов хулосасида, шунингдек, АҚШ фуқароларига бундай никоҳга рози бўлишлари учун 30 000 долларгача ҳақ берилгани қайд этилган.
Хабарда айтилишича, схема иштирокчилари хитойлик фуқароларга қонуний доимий яшовчи мақомини олишларига рухсат берилиши учун янги турмуш қурганларга АҚШ Ички хавфсизлик вазирлигига ҳужжатларни топширишда ҳам ёрдам кўрсатган.
Бош прокурор Тодд Бланш ушбу схемани "АҚШ тарихидаги никоҳ билан боғлиқ фирибгарлик бўйича энг йирик жиноий ишлардан бири" деб таърифлаб, бу "одамлар иммиграция тизимимизни алдаш учун нималарга қодир эканини" кўрсатиб берганини таъкидлади.
Бу воқеа ўтган ҳафта президент Доналд Трамп томонидан "туғуруқ туризми"ни чеклашга қаратилган фармойиш имзоланганидан кейин содир бўлди. Бу Трампнинг туғилиш ҳуқуқи бўйича фуқароликни чеклашга бўлган иккинчи уринишидир. 30-июн куни АҚШ Олий суди Трамп томонидан инаугурация куни имзоланган, АҚШ фуқароси бўлмаганлардан туғилган шахсларни автоматик фуқароликдан маҳрум қилувчи фармонни рад этганди.
Давлат департаменти АҚШга фақатгина ўз фарзандига фуқаролик олиб бериш мақсадида келаётган аёлларга қарши курашиш учун виза эгаларининг ҳаракатларини назоратдан ўтказиш ишларини бошлаганини маълум қилди.