Аниқланди ва зарарсизлантирилди
Террорчиларни қўллаб-қувватлашда айбланаётган ўзбекистонлик ўн йиллик қочиб юришдан кейин АҚШга экстрадиция қилинди
**Аниқланди ва зарарсизлантирилди**
Ўзбекистон фуқароси ва АҚШнинг натурализация қилинган фуқароси, шунингдек, Козимжон Ғафуров ва «Козим» номлари билан ҳам танилган Довуд Ансарий ўн йил давомида қочиб юрганидан сўнг Тбилисидан Нью-Йоркка экстрадиция қилинди.
41 ёшли Ансарий 2026 йил август ойида Грузияда ҳибсга олинган, 23 сентябрь куни эса Квинсдаги Жон Кеннеди номидаги аэропортга олиб келинган.
Нашрнинг хабар беришича, 24 сентябрь куни Бруклин федерал судида қўлга олинган шахсга нисбатан айблов эълон қилинган. Суд уни гаров эвазига озод қилиш ҳуқуқисиз ҳибсда қолдирди. Агар у бир нечта моддалар бўйича айбдор деб топилса, 35 йилгача озодликдан маҳрум этилиши мумкин.
«Бугун биз дунёга ФБР террорчилик ташкилотларини қўллаб-қувватловчи ва мамлакатни тарк этиб, адолатдан қочиб юрганларни унутмаслигини кўрсатмоқдамиз», — деди ФБР Нью-Йорк бошқармаси директори ёрдамчиси кичик Жеймс К. Барнакл.
АҚШ Шарқий округи прокуратураси маълумотларига кўра, Ансарий «Исломий давлат» (ИД) ва «Жабҳат ан-Нусра» (бир қатор мамлакатларда тақиқланган ташкилотлар) террорчилик ташкилотларининг тахмин қилинаётган тарафдорлари гуруҳига раҳбарлик қилган. 2014–2016 йилларда унинг Бруклиндаги уйидан туриб ҳаракат қилган гуруҳ ўзини «tea party» — «чойхўрлик» деб атаган.
Айблов талқинига кўра, гуруҳ аъзолари АҚШнинг ўша пайтдаги президенти Барак Обамани ўлдириш, Кони-Айлендда портлаш содир этиш ҳамда полиция ва Федерал тергов бюроси ходимларига ҳужум қилишни муҳокама қилишган. Улар юқорида тилга олинган террорчилик ташкилотлари аъзолари учун маблағ йиғишган. Хусусан, тергов талқинига кўра, Ансарий ва унинг шериклари 2013 йилда камида уч кишининг Сурияга сафарини молиялаштирган. Уларнинг уччаласи ҳам ҳалок бўлган деб тахмин қилинмоқда.
Бундан ташқари, улар 2017 йил охирида 15 йилга озодликдан маҳрум этилган қозоғистонлик Аҳрор Саидахметов учун пул йиғишган. У 2015 йилда, тергов маълумотларига кўра, ИДга содиқлик қасамёдини қабул қилганидан кейин ҳибсга олинган эди.
Гуруҳнинг яна бир тахмин қилинаётган аъзоси Абдурасул Жўрабоев ФБРга агар ИДдан шундай буйруқ олса, «Кони-Айлендга бомба қўйишини» айтган. У интернетда президентни ўлдириб, шаҳид бўлиш имкониятини ҳам муҳокама қилган. «Мен Обамани отиб ташлаш ва кейин ўзим ҳам отиб ўлдирилишим ҳақида гапиряпман — бу иш берадими? Бу кофирларнинг қалбига қўрқув солади», — деб ёзган у ўзбек тилида ИД билан боғлиқ сайтда.
2016 йил май ойида Ансарий бир кун олдин сотиб олинган бир томонлама чипта билан АҚШдан Туркияга учиб кетган. Унинг кетиши шерикларидан бири ҳибсга олинганидан беш кун ўтиб содир бўлган. Ўшандан бери Ансарий қидирувда эди.
Судда Ансарий тил бириктириш ва иккита террорчилик ташкилотига моддий ёрдам кўрсатишга уриниш айбловлари бўйича ўз айбини тан олмади.
Ишни Нью-Йорк Шарқий округи миллий хавфсизлик ва кибержиноятчилик бўлими олиб бормоқда.