Туркияда ўзбекистонлик аёлнинг ўлдирилиши юзасидан ўтказилган судда бир айбланувчи озод қилинди

Туркияда ўзбекистонлик аёлнинг ўлдирилиши бўйича ўтказилган суд жараёнида айбланувчилардан бири озод этилди. 15-сентябр куни бўлиб ўтган мажлис якунига кўра, Ў.Б. қамоқдан чиқарилди, У.S.ga доир қарор эса кейинги мажлисга қолдирилди.

Ушбу иш 2025-йил августида Истанбулнинг Умрание туманида юз берган қотиллик билан боғлиқ. Ўша вақтда турк ОАВ Иҳламуркую маҳалласидаги Айташи кўчасида Ўзбекистон фуқароси бўлган, 1992-йилда туғилган аёлга ҳужум қилингани ҳақида хабар берган.

Маълумотларга кўра, аёл кўчада кетаётган пайтда номаълум шахс томонидан пичоқланган. Ҳодиса жойига полиция ва тез ёрдам ходимлари етиб келган. Тиббиёт ходимлари аёлнинг бўйнидан жароҳат олганини ва у воқеа жойида вафот этганини аниқлаган.

Дастлабки хабарларда ҳужумни амалга оширган шахс воқеа жойидан қочиб кетгани, полиция эса уни аниқлаш ва қўлга олиш чораларини кўраётгани билдирилган эди.

Кейинчалик тергов жараёнида Ўзбекистон фуқароси У.С. ўз турмуш ўртоғини ўлдиришда айблангани маълум бўлди. Ў.B.ga эса жиноятни содир этишда ёрдам берганлик айби қўйилган.

Навбатдаги суд мажлисида Ў.B.ni қамоқда ушлаб туриш учун етарли асос йўқлиги аниқланиб, у озод қилинди. У.С. бўйича якуний қарор эса кейинги суд мажлисида эълон қилиниши кутилмоқда.

12-сентябр куни Туркиянинг Истанбул шаҳрида икки ўзбекистонлик аёлни ўлдириб, жасадларини бўлакларга ажратгани айтилган икки шахсга суд ҳукми ўқилганди. Суд Дилшод Турдимуродов ва Ғофуржон Камолхўжаевнинг ҳар бирини икки марта оғирлаштирилган умрбод қамоқ жазосига ҳукм қилган.