Андижонда сунъий интеллект жиноятчиликка қарши курашга жалб қилинади
Андижонда сунъий интеллект жиноятчиликка қарши курашга жалб қилинади
Андижондаги видеокамералар нафақат содир бўлаётган воқеаларни қайд этади, балки хавфли вазиятларни олдиндан аниқлаш ва хавф-хатарларни камайтириш учун сунъий интеллект ёрдамида маълумотларни таҳлил қилади.
Бу ҳақда Президент Шавкат Мирзиёев раислигида Андижон вилоятини ижтимоий-иқтисодий ривожлантириш масалаларига бағишланган йиғилишда маълум бўлди.
Режалаштирилган ишларни амалга ошириш учун Андижон шаҳри, шунингдек, Шаҳрихон ва Андижон туманларида ички ишлар органлари раҳбарларининг рақамлаштириш ва кибержиноятчиликка қарши курашиш учун масъул бўлган ўринбосарлари лавозимлари жорий этилади.
Уларнинг асосий вазифаси — шаҳар камералари билан ишлаш. Сунъий интеллект безорилик, ўғрилик ва йўл-транспорт ҳодисаларининг олдини олиш учун тасвирларни таҳлил қилади.
Интернет хавфсизлигига алоҳида эътибор қаратилади. Вилоятда киберҳужумлардан ҳимояланиш дастури ишлаб чиқилади ҳамда бюджет ташкилотлари ходимлари, мактаб ўқувчилари, талабалар ва пенсионерларга киберхавфсизлик асослари ўргатилади.
Йил якунига қадар ушбу тажрибани мамлакатнинг бошқа ҳудудларига ҳам татбиқ этиш режалаштирилган.
Бундан аввалроқ Президентга Андижон туманидаги гуманоид роботлар ва сунъий интеллект технологиялари аллақачон қўлланилаётган тўқимачилик корхонаси намойиш этилган эди.