Андижон вилояти аҳолисининг ичимлик суви билан таъминланиш даражаси 93 фоизга етди
Андижон вилояти аҳолисининг ичимлик суви билан таъминланиш даражаси 93 фоизга етди
Андижон вилоятида ичимлик суви таъминоти ва канализация хизматларини яхшилаш борасида фаол ишлар давом эттирилмоқда. Сўнгги йилларда ушбу соҳага 1,5 триллион сўм йўналтирилди, бунинг натижасида аҳолининг ичимлик суви билан таъминланиш даражаси 93 фоизга етди. Бугунги кунда бу Тошкентдан кейин мамлакатдаги иккинчи кўрсаткичдир.
Инфратузилмани янада мустаҳкамлаш ва бир миллион аҳолининг сув таъминотини яхшилаш мақсадида кейинги йилдан бошлаб Хонабод – Андижон магистрал сув қувурининг иккинчи тармоғини қуриш бошланади.
Шу билан бирга, оқова сув тизимини янгилаш ишлари ҳам давом эттирилмоқда. Андижон шаҳрининг ўзида ҳозирда 9 километрлик канализация тармоқлари реконструкция қилинмоқда, қолган 15 километрни модернизация қилиш учун эса зарур маблағлар ажратилиши кўзда тутилган.
Бундан ташқари, аҳолининг жадал ўсиши муносабати билан Олтинкўл туманидаги оқова сув тозалаш иншоотлари қувватини икки баробарга ошириш тўғрисида қарор қабул қилинди.
Мутасадди идораларга ушбу лойиҳани амалга оширишга кейинги йилдан бошлаб киришиш топширилди.