«Американи қайтадан кашф қилишнинг ҳожати йўқ». Таълим вазири — иш режалари ҳақида
Ўзбекистоннинг янги халқ таълими ва фан вазири Эркинжон Турдимов тизим самарадорлигини ошириш учун янги қонунлар қабул қилиш ёки янгиликлар ўйлаб топиш талаб этилмаслигини маълум қилди. Унинг сўзларига кўра, зарур шароитлар аллақачон яратилган, асосий вазифа эса — интизомни йўлга қўйиш ва талабчанликни оширишдан иборат.
«Американи қайтадан очишнинг ҳожати йўқ». Таълим вазири — иш режалари ҳақида
Бош вазирнинг биринчи ўринбосари — Ўзбекистон таълим ва фан вазири Эркинжон Турдимов 22 октябрь куни Самарқанддаги халқаро саммитда журналистларнинг янги лавозимдаги режалари ва устувор йўналишлари ҳақидаги саволларига жавоб берди.
Биринчи навбатда қандай янгиликларни жорий этмоқчи экани ҳақидаги саволга жавоб берар экан, вазир таълим тизимига янги ечимлар керак эмаслигини, мавжуд ишларни шунчаки тўғри ташкил этиш лозимлигини таъкидлади.
«Янгилик дегани нима? Биз ҳамма нарсани ўз ўрнига қўйишимиз керак, янгилик киритиш ва Американи қайтадан очишнинг ҳожати йўқ. Бугун давлат томонидан барча шароитлар яратилган. […] Агар сиз менга ёрдам бермасангиз, бошқалар ёрдам бермаса, ҳар бир, биринчи навбатда фарзанди бор ҳар бир фуқаро мактабда, фарзандининг таълимида ўз ўрнини топиши керак», — деди Турдимов.
Унинг сўзларига кўра, энг аввало тартиб-интизом ва белгиланган талабларга риоя қилинишини таъминлаш зарур.
«Ўтириб савол бериш осон. Тўғрими? Нима ва қандай қилмоқчисиз? Мен ҳеч нарса қилмайман. Мен фақат тартиб-интизомни йўлга қўйишни, тегишли талабчанликни ўрнатишни ва шу орқали эртага самарали натижага эришишни хоҳлайман. Янги қонунлар қабул қилмаймиз. Ҳамма нарса бор», — деди вазир.
Турдимов, шунингдек, журналистларга ўз фарзандларининг таълимига қанча вақт ажратаётганликлари ҳақида савол берди.
«Таълимингиз учун, фарзандингиз учун нима етмаяпти? Фарзандингиз борми? Бор. Ҳар куни ҳеч бўлмаганда бир соат вақтингизни у билан дарс қилишга ажратасизми? Ажратмайсиз. Чўзиб юришибди. А биз шу билан шуғулланишимиз, фарзандларимиздан сўрашимиз, уларни ўқитишимиз керак», — деди у.
Вазир таълим сифати нафақат ўқитувчилар ва давлат органларига, балки ота-оналар ва жамиятнинг муносабатига ҳам боғлиқлигини таъкидлади.
«Агар фарзандларимиз билан шуғулланмасдан, ўқитувчиларни доимо танқид қилаверсак, ўқитувчининг мақоми қачон кўтарилади? Қачонки сиз билан биз муносабатимизни ўзгартирсак. Муносабатни ўзгартирмасдан, фақат ўтириб камчилик излайверсак, бир жойда дерсинлаб тураверамиз. Шунинг учун таълим — жамиятнинг иши, ҳар биримизнинг ишимиздир», — деди Турдимов.
У янги вазирлик тизимнинг силкиниш даражаларида — мактабгача таълимдан тортиб олий таълим ва фангача — ўз ролини белгилаб олиши ва жамоатчилик билан биргаликда ишлаши кераклигини алоҳида қайд этди.
Устувор йўналишлар ҳақида гапирар экан, Турдимов таълимни мамлакат келажагига киритилган инвестиция деб атади. Ўқитиш сифатидан ташқари, у болалар тарбияси ва уларда ватанпарварлик туйғусини шакллантириш муҳимлигини таъкидлади.
«Бу келажакка киритилган инвестиция. Агар фарзандларимизга сармоя киритсак, бу бизга анча кўп ҳажмда қайтиб келади. Агар жамиятимизни соғломлаштиришни ва ривожланиш сари дадил қадам ташлашни хоҳласак, албатта, таълимга, келажакка сармоя киритишимиз керак», — деди вазир.
У хусусий таълимни ривожлантириш ҳақида ҳам алоҳида тўхталиб ўтди. Унинг фикрича, нодавлат муассасалари давлатнинг зиммасидаги юкнинг бир қисмини ўз зиммасига олиши мумкин, аммо уларни қўллаб-қувватлаш таълим сифатини назорат қилишдан воз кечишни англатмаслиги керак.
«Биз давлат ва таълим стандартларига тўлиқ жавоб берадиган, ўз базасига эга бўлган ва малакали мутахассислар тайёрлашга кўмаклаша оладиган хусусий сектор вакилларини ҳар томонлама қўллаб-қувватлашимиз керак», — деди Турдимов.
Журналистлар, шунингдек, вазирлик раҳбарияти янгиланганидан кейин таълим тизимининг ҳудудий бўлинмаларида эҳтимолий кадрлар ўзгариши ҳақида савол беришди.
«Ҳамма нарсани кадрлар ҳал қилади. Фақат кадрларни алмаштириш билан ҳеч нарсага эришиб бўлмайди. Ҳар ким ўз вазифасини бажариши, ҳамма бу аравани биргаликда тортиши керак. Уни тортишга қодир бўлмаганлар сафдан чиқади. Шунинг учун ҳамма нарса вақтга боғлиқ», — деб жавоб берди у.
Турдимовнинг сўзларига кўра, кадрлар бўйича ўзгаришлар ҳақидаги қарорлар жойлардаги ишлар таҳлил қилинганидан кейин қабул қилинади. Ҳозирча у алмаштирилиши мумкин бўлган муайян раҳбарлар ёки ходимларни нома-ном айтишга тайёр эмас.
Эслатиб ўтамиз, 3 октябрь куни президент Шавкат Мирзиёев Мактабгача ва мактаб таълими вазирлиги ҳамда Олий таълим, фан ва инновациялар вазирлигини ягона Таълим ва фан вазирлигига бирлаштириш тўғрисидаги фармонни имзолаган эди.
Ислоҳотнинг мақсади сифатида ягона таълим ва фан тизимини шакллантириш, ўқитишнинг турли босқичлари ўртасида узвийликни таъминлаш, таълим сифати ва бошқарув самарадорлигини ошириш кўрсатилган.
9 октябрь куни Эркинжон Турдимов бош вазирнинг биринчи ўринбосари — таълим ва фан вазири этиб тайинланди. Бунгача у Сирдарё вилояти ҳокими лавозимида ishlab келаётган эди.
Янги лавозимда Турдимов, шунингдек, таълим, фан ва соғлиқни сақлаш масалалари бўйича давлат органлари ва ҳудудий раҳбарлар фаолиятини мувофиқлаштиради.
Бир вақтнинг ўзида Вазирлар Маҳкамаси тузилмасида Таълим, фан ва соғлиқни сақлаш масалалари котибияти ташкил этилди. Ушбу соҳалардаги вазифалар ижросини ташкил этишни назорат қилиш Президент администрацияси раҳбари Саида Мирзиёевага юкланди.