Америкалик хонанда Леди Гага илк бор она бўлди
Америкалик хонанда Леди Гага илк бор она бўлди
40 ёшли поп-юлдуз Леди Гага (асл исми Стефани Жерманотта) оналик бахтига муяссар бўлди. Нашрлар берган маълумотларга кўра, бу хонанда ва унинг севгилиси, 42 ёшли тадбиркор Майкл Поланскининг илк фарзандидир.
Жуфтликни янги туғилган чақалоқ билан Шимолий Калифорнияда сайр қилаётган пайтда папарацсилар суратга олишга улгурган. Ҳозирча чақалоқнинг исми ҳам, туғилган санаси ҳам ошкор қилинмаган.
Леди Гага ва Майкл Полански 2019-йилда учраша бошлаган, 2024-йил апрелида эса унаштирилган эди.
Гага она бўлиш истаги ҳақида аввал ҳам бир неча бор гапирган.
“Мен ҳали кўп нарсаларни амалга оширмоқчиман. Бунинг учун барча имкониятлар очиқ. Лекин ҳақиқатан ҳам она бўлишни истайман. Умид қиламанки, бу менинг кейинги бош ролим бўлади”, деган эди у 2025-йилда “Стивен Колбер билан кечки шоу”да.
“Майкл билан фарзандларимизга мустақил шахс бўлиб улғайишига имкон бериш ҳақида кўп суҳбатлашганмиз. Бу дунёга келаётган болалар учун жуда муҳим. Болаларга қандай фикрлаш, нимага ишониш, нима ейиш кераклигини айтишади... Мен эса фарзандларим ўзларининг кимлигини ўзлари англаб етишларини истайман”, дея ўз фикрларини ўртоқлашган эди поп юлдузи ўтган йили Элле нашрига берган интервюсида.
Леди Гага бўлажак фарзандининг унинг шуҳратига қандай муносабатда бўлиши ҳақида ҳам ўйлаб кўрган.
“Мен шунчаки бор кучим билан ҳаракат қилдим, бу йўлда ўзлигимга содиқ қолишга интилдим. Фарзандим бир кун келиб мендан: “Ойи, нега бундай қиласиз? Ғалати кийиниб олган кулгили видеонгизни кўрдим”, деб сўраши мумкин. Бу аниқ содир бўлади. Биласизми, ўшанда ундан: “Ўзинг бу ҳақда нима деб ўйлайсан?” деб сўраш, менимча, мутлақо табиий ҳол”, деган у.