Афинада 200 метрли осмонўпар бино қурилмоқда
Афина соҳилида Грециянинг энг баланд биноси бўлиши кутилаётган 200 метрли Ривиера Товер қурилмоқда. У шаҳардаги одатий 32 метрлик баландлик чекловидан олти баравардан ҳам баланд бўлади. Лойиҳа махсус истисно асосида рухсат олган, бироқ аҳоли орасида баҳсларга сабаб бўлмоқда.
Афинада 200 метр баландликдаги осмонўпар бино бунёд этилмоқда. Бу иншоот 9 миллиард долларлик Эллиникон шаҳарсозлик лойиҳасининг асосий объектларидан бири бўлади. Қурилиш майдони Афина Ривиерасида — Пирей портидан Посейдон ибодатхонасигача чўзилган қирғоқ ҳудудида жойлашган. Унинг майдони Монако ҳудудидан тахминан уч баравар катта.
Лойиҳа доирасида бир нечта турар жой маҳалласида минглаб уйлар, Ҳард Роск меҳмонхонаси ва казиноси, савдо маркази ҳамда янги жамоат пляжи қурилиши режалаштирилган.
Бундан ташқари, спорт мажмуаси, мактаблар, офислар ва тиббиёт муассасалари ҳам барпо этилади. Катта боғда эса икки миллион квадрат метр яшил ҳудуд яратиш кўзда тутилган.
Ривиера Товер атрофидаги баҳсларнинг асосий сабаби унинг баландлиги ва Афинанинг тарихий қиёфасига таъсиридир. Шаҳарда бинолар баландлиги одатда 32 метр билан чекланади. Бу Акропол ва ундаги Парфенонга очиқ манзарани сақлашга хизмат қилади.
200 метрли минора ҳамда бутун Эллиникон лойиҳаси амалдаги қурилиш меъёрларидан истисно тариқасида рухсат олган. Шу сабабли янги бино атрофдаги паст қаватли иморатлар орасида яққол ажралиб туради.
Манбада келтирилган 2025-йилги сўров натижаларига кўра, респондентларнинг 63 фоизи Ривиера Товер қурилишига қарши чиққан. Ҳудудни қайта қуришга қаратилган бутун Эллиникон лойиҳасини эса 41 фоиз иштирокчи қўллаб-қувватламаган.
Тарихий марказдан маълум масофада жойлашган бўлса-да, осмонўпар бинонинг шаҳар манзарасига таъсири танқидчиларнинг асосий эътирозларидан бири бўлиб қолмоқда. Лойиҳа Афинада замонавий қурилиш билан қадимий меъморий меросни асраш ўртасидаги мувозанат масаласини кун тартибига олиб чиққан.