Афғонистонлик аёл махфий «чет эллик террорчи» судининг илк бор қўлланилиши натижасида АҚШдан депортация қилинди
АҚШнинг қонуний резиденти ҳеч қачон жиноятда айбланмаган, аммо оиласининг терроризмга алоқадорлиги сабабли депортация қилинган.
Афғонистонлик аёл махфий «террорчи чет элликлар» судининг илк бор қўлланилиши натижасида АҚШдан депортация қилинди
АҚШда қонуний доимий резидент сифатида Техасда яшаган афғонистонлик аёл махфий суднинг илк маълум қўлланилиши натижасида мамлакатдан чиқариб юборилди.
АҚШ Адлия вазирлиги ва унинг адвокатларига кўра, 47 ёшли Назира Ҳожи Зода Террорчи чет элликларни чиқариб юбориш судида ўз иши бўйича курашни давом эттиришдан кўра АҚШни тарк этишни афзал кўрган.
Террорчи чет элликларни чиқариб юбориш суди 1996 йилда ташкил этилган бўлса-да, шу йилнинг июль ойидаги жараёнгача бирор марта иш кўрмаган эди. У далиллар махфий ва миллий хавфсизликка боғлиқ бўлган тақдирда, терроризм билан боғлиқ жиноятларда айбланаётган АҚШ фуқароси бўлмаган шахслар учун мўлжалланган.
Ҳожи Зоданинг адвокатлари ушбу иш унинг АҚШ Конституцияси бўйича тегишли ҳуқуқий тартиб-таомилларга бўлган ҳуқуқини бузганини айтишди.
Афғонистон фуқароси бўлган Ҳожи Зодага ҳеч қачон жиноий айблов қўйилмаган, гарчи прокурорлар унинг ўғли ва куёвини террорчилик айбловлари билан судлаб, маҳкум қилган бўлса-да.
Унинг ўғли Абдуллоҳ Ҳожи Зода ва куёви Носир Аҳмад Тавҳидий 2024 йилги Сайлов кунида ўзини Исломий давлат деб атовчи гуруҳдан илҳомланган ҳолда оммавий отишма содир этиш фитнасида айбдор деб топилган эди.
Форт-Уэрт (Техас штати)да яшаб келган Ҳожи Зода прокурорлар томонидан гуруҳнинг «раҳнамоси» ва «оилани радикаллаштириш устида ишлаганлик»да айбланган.
Жума куни берган баёнотида Адлия вазирлиги унинг «ўзини террорчи чет эллик деб тан олгани ва чиқариб юбориш тўғрисидаги қарор устидан апелляция беришдан воз кечиб, ўзининг аввалги [иммиграция] мақомини тугатганини» маълум қилди.
«Ушбу террорчи чет элликнинг ўз ватанига тез фурсатда чиқариб юборилиши билан якунланган ушбу тарихий иш миллий хавфсизлик ва қонун устуворлиги учун ғалабадир», деди АҚШ Бош прокурори Тодд Бланш.
Ҳожи Зоданинг суд томонидан тайинланган адвокатлари ўзларига унинг ишидаги далиллар билан танишиш имконияти берилмаганини айтишди.
«Мижозимизнинг мамлакатдан чиқариб юборилишига розилик бериш ҳақидаги қарори ушбу суднинг қонунийлигини тан олиш сифатида баҳоланмаслиги керак», деди жамоат ҳимоячилари Мэттью Фарли ва Мэри Мэннинг Петрас The Washington Post газетасига берган баёнотида.
«Қонуний доимий резидентларни судга судраб келиш, лекин уларга ёки уларнинг адвокатларига қарши ишлатиладиган далилларни кўрсатишдан бош тортиш тегишли ҳуқуқий тартиб-таомилларнинг очиқдан-очиқ бузилишидир. Ишончимиз комилки, судьядан ушбу масалани кўриб чиқиш сўралиши билан Террорчи чет элликларни чиқариб юбориш суди конституцияга зид деб топилади ва бекор қилинади», деди улар.