Абдумажидов январдан Франсиянинг “Брест” клуби футболчиси бўлади
“Пахтакор” ҳимоячиси Муҳаммадрасул Абдумажидов 1 январдан Франсиянинг “Брест” клуби сафида фаолиятини давом эттиради.
Абдумажидов январдан Франсиянинг “Брест” клуби футболчисига айланади
Тошкентнинг “Пахтакор” клуби ҳимоячиси Муҳаммадрасул Абдумажидов фаолиятини Франсиянинг “Брест” клубида давом эттиради. Футболчи 1 январдан бошлаб клубга қўшилади. Бу ҳақда “Пахтакор” бош мураббийи Камолиддин Тожиев маълум қилди.
Мураббийнинг айтишича, томонлар футболчи билан шартнома имзолаб бўлган. Шу билан бирга, Абдумажидов жамоага ёрдам бериш мақсадида жорий мавсум якунига қадар “Пахтакор”да қолишга қарор қилган.
«Муҳаммадрасулнинг ўзи жамоада қолиб, ёрдам беришни хоҳлади», — деди Тожиев.
Аввалроқ Франсия клуби “Пахтакор”нинг 22 ёшли ҳимоячисига қизиқиш билдирган эди. Август ойи охирида “Брест” футболчини бир мавсумга ижарага олиш ва кейинчалик уни сотиб олиш имкониятига эга бўлишни истагани ҳақида хабар берилган. Бироқ Тошкент клуби футболчининг ўтишига рози бўлмаган.
Тожиев таклиф эртароқ келганида вазият бошқача бўлиши мумкинлигини ҳам таъкидлади. Унинг сўзларига кўра, агар тегишли хат олдинроқ келганида, клуб футболчини Франсияга қўйиб юборишга рози бўлиши мумкин эди.
“Пахтакор” бош мураббийи бунга мисол сифатида ўтган йили Тошкент клубидан Белгия жамоасига ўтган Муҳаммадали Ўринбоевни келтирди.