Абдумажидов январдан бошлаб Франциянинг «Брест» клуби футболчисига айланади
«Пахтакор» ҳимоячиси Муҳаммадрасул Абдумажидов 1 январдан бошлаб Франциянинг «Брест» клубига ўтади. Клуб билан шартнома имзолаб бўлинган.
Абдумажидов январдан бошлаб Франциянинг «Брест» клуби ўйинчисига айланади
Тошкентнинг «Пахтакор» клуби ҳимоячиси Муҳаммадрасул Абдумажидов фаолиятини Франциянинг «Брест» клубида давом эттиради. Футболчи 1 январдан бошлаб клубга қўшилади, бу ҳақда «Пахтакор» бош мураббийи Камолиддин Тожиев маълум қилди.
Мураббийнинг сўзларига кўра, ўйинчи билан шартнома аллақачон ҳар икки томонлама имзоланган. Шу билан бирга, Абдумажидов жамоага ёрдам бериш учун жорий давр якунига қадар «Пахтакор»да қолишга қарор қилган.
«Муҳаммадрасулнинг ўзи жамоада қолишни ва ёрдам беришни истади», — деди Тожиев.
Бундан аввалроқ Франция клуби «Пахтакор»нинг 22 ёшли ҳимоячисига қизиқиш билдирган эди. Август ойи охирида «Брест» футболчини кейинчалик сотиб олиш ҳуқуқи билан бир мавсумга ижарага олмоқчи бўлгани, бироқ Тошкент клуби бу ўтишга рози бўлмагани хабар қилинганди.
Тожиев, шунингдек, таклиф эртароқ тушганида вазият ўзгариши мумкин бўлганини таъкидлади. Унинг сўзларига кўра, агар тегишли хат эртароқ келганида, клуб, эҳтимол, ўйинчини Францияга қўйиб юборишга рози бўларди.
«Пахтакор» бош мураббийи ўтган йили Тошкент клубидан Бельгия жамоасига ўтган Муҳаммадали Ўринбоевни мисол қилиб келтирди.